Reuters: უკრაინის თავდასხმების შემდეგ რუსეთმა დონ-აზოვის არხზე გემების მოძრაობა დროებით შეაჩერა

რუსეთმა დროებით შეაჩერა გემების მოძრაობა დონ-აზოვის არხზე, რომელიც მდინარე დონს აზოვის ზღვასთან აკავშირებს. ინფორმაციას Reuters-ი მარცვლეულის ექსპორტის სექტორის სამ წყაროზე დაყრდნობით ავრცელებს.

წყაროების ინფორმაციით, გადაწყვეტილება მას შემდეგ მიიღეს, რაც უკრაინამ პარასკევს აზოვის ზღვაში 13 რუსულ ხომალდს შეუტია, მათ შორის 10 ტანკერს.

ბაზრის ანალიტიკოსების შეფასებით, აზოვის ზღვით გადის რუსეთის ხორბლის ექსპორტის დაახლოებით მეოთხედი. რუსეთი კი მსოფლიოში ხორბლის უმსხვილესი ექსპორტიორია.

ერთ-ერთი წყაროს ცნობით, რუსეთის სასაზღვრო სამსახურმა გადამზიდავ კომპანიებს აცნობა, რომ პარასკევს, ადგილობრივი დროით 18:10 საათიდან, ქერჩის სრუტეში გავლის ყველა ახალი განაცხადის მიღება შეჩერდა. ქერჩის სრუტე აზოვისა და შავ ზღვებს ერთმანეთთან აკავშირებს. შეტყობინებაში არ არის მითითებული, როდის აღდგება გემების მოძრაობა.

რუსეთის მარცვლეულის წარმოების ორი უმსხვილესი რეგიონი - როსტოვისა და კრასნოდარის მხარეები - აზოვის ზღვის სანაპიროზე მდებარეობს. შავი ზღვის აუზში რუსეთის სიდიდით მეორე პორტიც ქერჩის სრუტის მიმდებარედ არის განთავსებული.

აზოვის ზღვით გადაზიდვების შესაძლო შეჩერების შესახებ გავრცელებული ინფორმაციის ფონზე, ევროპულ ბირჟა Euronext-ზე ხორბლის ფასი პარასკევს 4%-მდე გაიზარდა და ბოლო ექვსი კვირის მაქსიმუმს მიაღწია.

Reuters-ის ცნობით, უკრაინამ ბოლო პერიოდში რუსეთის ნავთობგადამამუშავებელ ქარხნებზე თავდასხმები გააძლიერა, რამაც ქვეყანაში საწვავის დეფიციტი გამოიწვია.

ბევრი ანალიტიკოსი და საერთაშორისო ორგანიზაცია უკვე წლებია აფრთხილებს, რომ უკრაინაში მიმდინარე ომი მსოფლიო მარცვლეულის ვაჭრობისთვის მნიშვნელოვან რისკს წარმოადგენს, რადგან როგორც უკრაინა, ისე რუსეთი მარცვლეულის ექსპორტისთვის შავ ზღვას იყენებენ. თუმცა, ოთხწელიწად-ნახევრიანი ომის განმავლობაში მარცვლეულის გლობალური ვაჭრობა მასშტაბურად არ შეფერხებულა.