რკინიგზაში გამოვლენილ კორუფციულ დანაშაულზე დაკავებულებს ბრალს აცნობენ
რკინიგზაში გამოვლენილ კორუფციულ დანაშაულზე დაკავებულებს ბრალს აცნობენ. სახელმწიფო უსაფრთხოების სამსახურში ბრალდებულებთან ადვოკატები და გამომძიებლები იმყოფებიან.
„ველოდებით ამ ბრალის მასალებს და იქ გამოჩნდება რა ჩვენებები თუ დოკუმენტებია. ნაწილში ცნობდა, ნაწილს არა, რადგან როდესაც ჯართის ბიზნესით არის ადამიანი დაკავებული და თან წლების განმავლობაში, ისინი ყველა ერთმანეთს იცნობდნენ. მთავარი არის დადგინდეს, მათ შორის იყო რაიმე კანონსაწინააღმდეგო თუ კანონშესაბამისი ურთიერთობები. ჩემი დაცვის ქვეშ მყოფი ამტკიცებს, რომ კანონსაწინააღმდეგო მას არაფერი ჩაუდენია“, - განაცხადა ადვოკატმა გელა ნიკოლაიშვილმა.
„ბრიფინგის ფაქტები უნდა იყოს დადასტურებული საქმის მასალებით, რომელსაც ჩვენ ამ ეტაპზე არ ვიცნობთ. ამ ყველაფერზე დეტალურ ინფორმაციას აუცილებლად მოგაწვდით, რადგან ჩვენთვისაც მნიშვნელოვანია, რომ პროცესი გამჭვირვალე იყოს“, - განაცხადა ადვოკატმა სალომე ჯანუაშვილმა.
„ჩემი დაცვის ქვეშ მყოფს დანაშაული არ ჩაუდენია, ის გამოიყენებს დუმილის უფლებას და შემდგომ ვნახავთ საქმეში რა მტკიცებულებები არსებობს და იმის მიხედვით გავაკეთებთ დამატებით შეფასებას. ის იყო ფერადი ლითონებით ჩაბარებით დაკავებული და ასევე იყო ტრაქტორის მძღოლი“, - განაცხადა ადვოკატმა გიორგი ლაღიძემ.
„არანაირი დოკუმენტის გაყალბება მისი მხრიდან არ ყოფილა. უფრო დეტალურად გავეცნობით ბრალის დადგენილებას, გავიგებთ რას გვედავება ბრალდების მხარე და შესაბამისი პოზიცია გვექნება“, - განაცხადა ადვოკატმა დიანა გვიშიანმა.
