რობერტ სტურუა - 88. „იმედის კვირის“ მილოცვა მაესტროს

ქართული თეატრალური სამყაროს უმნიშვნელოვანეს ფიგურას, მაესტროს, რობერტ სტურუას „იმედის კვირა“ 88 წლის იუბილეს წინასწარ ულოცავს.

რობერტ სტურუა 1938 წლის 31 ივლისს თბილისში დაიბადა. 1961 წელს დაამთავრა თბილისის შოთა რუსთაველის სახელობის თეატრალური ინსტიტუტი, 1962 წლიდან მისი პროფესიული ცხოვრება რუსთაველის თეატრს დაუკავშირდა. 1979 წლიდან ის თეატრის მთავარი რეჟისორია, 1980 წლიდან კი - სამხატვრო ხელმძღვანელი. სწორედ მისი შემოქმედებითი ხედვით შეიქმნა არაერთი სპექტაკლი, რომლებმაც ქართული თეატრის ისტორია დაწერა და საერთაშორისო აღიარებაც მოიპოვა.

მის ყველაზე ცნობილ დადგმებს შორისაა: „სეილემის პროცესი“, „სამანიშვილის დედინაცვალი“, „ხანუმა“, „ყვარყვარე“, „რიჩარდ მესამე“, „კავკასიური ცარცის წრე“, „მეფე ლირი“, „ჰამლეტი“, „ლამარა“ და ,,ვეფხისტყაოსანი“, რომლის პრემიერაც სულ ცოტახნის წინ შედგა.

რობერტ სტურუას სახელი ქართული თეატრის ისტორიაში შეუდარებელია. მისი სპექტაკლები მსოფლიო თეატრალური ხელოვნების ოქროს ფონდში საპატიო ადგილს იკავებს.