რუბიო აცხადებს, რომ მისი აზრით, ირანელი მომლაპარაკებლები სერიოზულად არიან განწყობილნი აშშ-თან შეთანხმების მისაღწევად
აშშ-ის სახელმწიფო მდივანი, მარკო რუბიო აცხადებს, რომ მისი აზრით, ირანელი მომლაპარაკებლები „სერიოზულად“ არიან განწყობილნი აშშ-თან შეთანხმების მისაღწევად.
რუბიომ ეს განცხადება ორშაბათს, Fox News-თან ინტერვიუში გააკეთა. მისი თქმით, რეჟიმის ხელმძღვანელობა განადგურებულია და ცდილობს „დრო მოიგოს“.
„ვფიქრობ, ისინი სერიოზულად ცდილობენ იმ ქაოსიდან თავის დაღწევას, რომელშიც აღმოჩნდნენ. ყველა ის პრობლემა, რაც ირანს ჰქონდა, კვლავ არსებობს. რამდენიმე თვის წინ მათ ჰქონდათ გამოსვლები, ეს იყო ეკონომიკური პროტესტი. ყველა ის სირთულე, რაც ირანს ამ კონფლიქტის დაწყებამდე ჰქონდა, კვლავ აქტუალურია და მათი უმეტესობა გაუარესდა. ფასების ინფლაცია უფრო მაღალია. მათ კვლავ აწუხებთ გვალვა. კვლავ აქვთ პრობლემები ხელფასების გაცემასთან დაკავშირებით. მათი ეკონომიკა პარალიზებულია, ისინი მთელ მსოფლიოში მკაცრი ეკონომიკური სანქციების წინაშე დგანან. ყველა ეს პრობლემა სახეზეა და ბევრი მათგანი დამძიმდა. ახლა კი მათ რაკეტების მხოლოდ ნახევარი დარჩათ, ქარხნები აღარ აქვთ, აღარ ჰყავთ სამხედრო-საზღვაო და სამხედრო-საჰაერო ძალები. ეს ყველაფერი განადგურდა. ასე რომ, ისინი უფრო მძიმე მდგომარეობაში და უფრო სუსტები არიან“, - განაცხადა რუბიომ.
„შევახსენებდი, რომ ირანის წინააღმდეგ დაწესებული სანქციების დონე საგანგებოა. ირანზე ზეწოლა უპრეცედენტოა და ვფიქრობ, კიდევ უფრო მეტი ბერკეტის გამოყენებაა შესაძლებელი. მაგრამ ვიმედოვნებ, რომ ამ კონფლიქტის შემდეგ მთელ მსოფლიოს თვალი აეხილა იმ საფრთხეზე, რომელსაც ირანი წარმოადგენს. ვიმეორებ, მათ სურთ მსოფლიოს ბირთვული იარაღით ის გაუკეთონ, რასაც ახლა ნავთობით აკეთებენ - სურთ მსოფლიო მძევლად აიყვანონ, რათა აკეთონ ის, რაც მოესურვებათ. ეს მიუღებელია“, - დასძინა მან.
იმედი
წყარო: imedinews.ge