რუდი ჯულიანი ჰოსპიტალიზებულია

აშშ-ის პრეზიდენტის დონალდ ტრამპის ყოფილი ადვოკატი და თანამებრძოლი, ნიუ-იორკის ექს-მერი რუდი ჯულიანი საავადმყოფოში კრიტიკულ, თუმცა სტაბილურ მდგომარეობაში იმყოფება.

როგორც CNN-ს ჯულიანის წარმომადგენელმა ტედ გუდმენმა განუცხადა, „მერი ჯულიანი მებრძოლია, რომელიც გაუტეხელი ძალით ლახავდა თავისი ცხოვრების ყველა გამოწვევას და სწორედ ასეთივე ძალით იბრძვის ის ახლაც“.

გუდმენის განცხადებაში არ არის დაკონკრეტებული, თუ რატომ მოხვდა 81 წლის ჯულიანი საავადმყოფოში.

პარასკევს, თავისი გადაცემის America's Mayor Live მსვლელობისას პლატფორმა X-ზე, ჯულიანმა მაყურებელს უთხრა, რომ ხმამ ცოტათი უღალატა, ამიტომ ჩვეულებრივზე ხმამაღლა ვერ ისაუბრებდა. ტრანსლაციის დროს ის ხშირად ახველებდა.

დონალდ ტრამპმა Truth Social-ზე დაწერა, რომ ჯულიანი არის „ნამდვილი მებრძოლი და საუკეთესო მერი ნიუ-იორკის ისტორიაში“. მან ასევე დაადასტურა, რომ ჯულიანი „კრიტიკულ მდგომარეობაში იმყოფება“.