რუს და ბელარუს ტანმოვარჯიშეებს საერთაშორისო ტურნირებზე დროშითა და ჰიმნით გამოსვლის უფლება მისცეს

ტანვარჯიშის საერთაშორისო ფედერაციის აღმასრულებელმა კომიტეტმა რუსი და ბელარუსი სპორტსმენებისთვის 2022 წლის თებერვლიდან მოქმედი შეზღუდვები მოხსნა და ისინი ტურნირებზე დროშითა და ჰიმნით დაუშვა.

გადაწყვეტილება ორგანიზაციის აღმასრულებელი კომიტეტის სხდომაზე მიიღეს, რომელიც 16-17 მაისს შარმ-ელ-შეიხში გაიმართა და ის ძალაში უკვე შევიდა.

გადაწყვეტილება მოიცავს ხუთივე დისციპლინას, რომლებიც რუსეთის ტანვარჯიშის ფედერაციის შემადგენლობაში შედის: სპორტულ ტანვარჯიშს, მხატვრულ ტანვარჯიშს, ბატუტზე ხტომას, სპორტულ აკრობატიკასა და სპორტულ აერობიკას.

რუსეთის დროშის ქვეშ პირველად სპორტული აკრობატიკის წარმომადგენლები გამოვლენ მსოფლიო თასის ეტაპზე, რომელიც ბულგარეთის ქალაქ ბურგასში 29-დან 31 მაისამდე გაიმართება.