რუსული საფრთხის გაძლიერების ფონზე მაკრონმა მთავრობას კრიტიკული ინფრასტრუქტურის დაცვის გეგმის შემუშავება დაავალა

საფრანგეთის პრეზიდენტმა, ემანუელ მაკრონმა პარასკევს გამოაცხადა, რომ მთავრობას „კრიტიკული ინფრასტრუქტურის დაცვის გეგმის“ შემუშავება დაავალა.

საერთაშორისო ვითარების გაუარესების გამო, ემანუელ მაკრონმა ელისეს სასახლეში პარლამენტში წარმოდგენილი პარტიების ლიდერები მიიღო.

შეხვედრა უკრაინასა და ახლო აღმოსავლეთში მიმდინარე კონფლიქტების შედეგებს დაეთმო და მას დაზვერვის სამსახურების ხელმძღვანელებიც ესწრებოდნენ.

შეხვედრის დასრულების შემდეგ, სახელმწიფოს მეთაურმა პრესკონფერენცია გამართა და განხილული საკითხები შეაჯამა. ემანუელ მაკრონმა განსაკუთრებული ყურადღება გაამახვილა რუსულ ჰიბრიდულ საფრთხეზე, რომელიც საფრანგეთს ემუქრება.

„ბოლო კვირების განმავლობაში ევროპელებისა და საფრანგეთის წინააღმდეგ რუსული ჰიბრიდული საფრთხე გაძლიერდა. ზაფხულიდან მოყოლებული, რუსეთმა გაახშირა თავდასხმები ევროპულ ინტერესებზე“, - განაცხადა პრეზიდენტმა ელისეს სასახლის ეზოში.

მან, კერძოდ, ახსენა აგვისტოს დასაწყისში ლაიფციგის აეროპორტში ასაფეთქებელი დრონების აღმოჩენის ფაქტი. „ამ ქმედებების უკან დგას ჩვენი დაშინებისა და უკრაინელების მხარდაჭერის პროცესის ჩაშლის სურვილი. თუმცა შედეგი საპირისპირო იქნება“, - აღნიშნა პრეზიდენტმა.

მაკრონმა განაცხადა, რომ ამ საფრთხის პასუხი უკრაინის მხარდაჭერაში მდგომარეობს - ეს არის „უალტერნატივო ბერკეტი, რადგან ის ჩვენი უსაფრთხოებისა და სამართლიანი, ხანგრძლივი მშვიდობის დაბრუნების წინაპირობას წარმოადგენს“. „ჩვენ ვერ დაგვაშინებენ, რადგან ვიცით, რომ უკრაინაში წყდება ჩვენი დღევანდელი და ხვალინდელი უსაფრთხოების ბედი“, - ხაზგასმით აღნიშნა პრეზიდენტმა.