სახელმწიფო მინისტრის აპარატის ორგანიზებით, მშვიდობის საერთაშორისო დღესთან დაკავშირებული მაღალი დონის ღონისძიება სახელწოდებით „ახალგაზრდები მშვიდობისთვის“ გაიმართა

სახელმწიფო მინისტრის აპარატის ორგანიზებით, მშვიდობის საერთაშორისო დღესთან დაკავშირებული მაღალი დონის ღონისძიება სახელწოდებით „ახალგაზრდები მშვიდობისთვის“ გაიმართა. ღონისძიება მისასალმებელი სიტყვით გახსნეს და დამსწრე საზოგადოებას მიმართეს საქართველოს პარლამენტის თავმჯდომარემ შალვა პაპუაშვილმა და სახელმწიფო მინისტრმა თეა ახვლედიანმა. „წელსაც, მშვიდობის საერთაშორისო დღისადმი მიძღვნილ ღონისძიებაზე, გამოვავლინეთ მშვიდობის ჯილდოს 2026 წლის გამარჯვებული ახალგაზრდები, რომელთაც მსურს, კიდევ ერთხელ მივულოცო და ვუსურვო წარმატებები. სწორედ ახალგაზრდების მხარდასაჭერად, სახელმწიფო მინისტრის აპარატის მიერ დაარსებული ინიციატივის ხუთწლიანი განვითარების გზაზე, მისასალმებელია, რომ უკვე მრავალ ახალგაზრდას მიეცა მშვიდობის მშენებლობისა და ჩვენი ეროვნული პრიორიტეტების მნიშვნელობის უფრო სიღრმისეულად გააზრების შესაძლებლობა; სამშვიდობო მისწრაფებებით გამორჩეული სულ უფრო მეტი ახალგაზრდა გამოხატავს სურვილს, მზაობას, პასუხისმგებლობას თავისი წვლილი შეიტანოს ომით შეჩერებული ქართულ-აფხაზური და ქართულ-ოსური კავშირების აღდგენაში. იმედი მაქვს, რომ ჩვენი წლევანდელი გამარჯვებულებიც, აუცილებლად, შეუერთდებიან ამ ახალგაზრდულ ძალისხმევას და თვითონაც გახდებიან შერიგებისა და დიალოგისკენ მიმართული ახალი სივრცეების ინიციატორები,“- განაცხადა სახელმწიფო მინისტრმა თეა ახვლედიანმა,“ - განაცხადა სახელმწიფო მინისტრმა თეა ახვლედიანმა. ღონისძიებაზე შეკრებილ საზოგადოებას დისტანციურად მიმართა გაეროს გენერალური მდივნის თანაშემწემ მშვიდობის მშენებლობის მხარდაჭერის საკითხებში, ელიზაბეტ სპეჰარმა. სიტყვით ასევე გამოვიდნენ საქართველოს პარლამენტის თავმჯდომარის პირველი მოადგილე და ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის თავმჯდომარე გიორგი ვოლსკი, საგარეო საქმეთა მინისტრის მოადგილე ხათუნა თოთლაძე, განათლების, მეცნიერებისა და ახალგაზრდობის მინისტრის მოადგილე თამარ მახარაშვილი და გაერო-ს მუდმივი კოორდინატორი საქართველოში დიდიე ტღებიუკი. ღონისძიების ფარგლებში, თეა ახვლედიანმა სახელმწიფო მინისტრის აპარატის მიერ დაწესებული ყოველწლიური კონკურსის „მშვიდობის ჯილდოს ახალგაზრდებისთვის“ გამარჯვებულები დააჯილდოვა. ნომინაციაში „საუკეთესო სამშვიდობო იდეა“ - ორი გამარჯვებული გამოვლინდა: ანა დვალი / ზეინაბ აკვაზბა და ნიკოლოზ ოვსიანიკოვი. თითოეულ ნომინაციაში გამარჯვებულს გადაეცა სახელმწიფო მინისტრის აპარატის მიერ დაარსებული პრემია 3000 ლარის ოდენობით. ამასთან, ევროპის საბჭოს მხარდაჭერითა და უშუალო ჩართულობით, გამარჯვებული ახალგაზრდები ქალაქ სტრასბურგში მონაწილეობას მიიღებენ დემოკრატიის მსოფლიო ფორუმში.

მშვიდობის დღისადმი მიძღვნილ ღონისძიებას ესწრებოდნენ საქართველოს პარლამენტის, სახელმწიფო უწყებებისა და ადგილობრივი ხელისუფლების წარმომადგენლები, საქართველოში აკრედიტებული დიპლომატიური მისიებისა და საერთაშორისო ორგანიზაციების ხელმძღვანელები, ასევე სამოქალაქო საზოგადოებისა და აკადემიური წრეების წარმომადგენლები და ახალგაზრდები. „მშვიდობის ჯილდო ახალგაზრდებისთვის“ დაწესებულია შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის მიერ 2021 წელს და ყოველწლიურად გადაეცემა ახალგაზრდას ან ახალგაზრდების ჯგუფს, მათ შორის ოკუპირებული ტერიტორიებიდან, რომლებსაც საქართველოს მთავრობის კონფლიქტის მშვიდობიანი მოგვარების პოლიტიკის მიზნებისა და ამოცანების გათვალისწინებით, საკუთარი საქმიანობითა და აქტივობით განსაკუთრებული წვლილი შეაქვთ მშვიდობის მშენებლობის და ომით გაყოფილ საზოგადოების წევრებს შორის შერიგებისა და ნდობის აღდგენის, ასევე კონფლიქტით დაზარალებულ მოსახლეობაზე ზრუნვის პროცესში.

ინფორმაციას სახელმწიფო მინისტრის აპარატი ავრცელებს.