საპატრიარქოში წმინდა სინოდის სხდომა მიმდინარეობს
საპატრიარქოში საქართველოს მართლმადიდებელი ეკლესიის წმინდა სინოდის სხდომა მიმდინარეობს. სხდომას 38 მღვდელმთავარი ესწრება. მანამდე სინოდის წევრებმა ილია მეორის სულის მოსახსენებელი პანაშვიდი აღავლინეს.
„სინოდის წევრებმა სრულიად საქართველოს კათოლიკოს-პატრიარქ ილია II - ის პანაშვიდი იმსახურეს და სხდომა დაიწყო“, - წერს სოციალურ ქსელში საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე.
სინოდის დღევანდელ სხდომაზე მღვდელმთავრები საპატრიარქო ტახტის სამ კანდიდატს აირჩევენ. გაფართოებულ კრებაზე, რომელიც 17 მაისამდე დაინიშნება, სწორედ დღეს არჩეული კანდიდატებიდან სინოდი საქართველოს 142-ე პატრიარქს გამოავლენს. თუ გაფართოებულ კრებაზე კანდიდატებიდან ვერც ერთი ვერ მოიპოვებს ხმათა უმრავლესობას, გაიმართება მეორე ტური, რომელშიც მონაწილეობას ხმათა უმრავლესობის მქონე ორი კანდიდატი მიიღებს.
ანდრია ჯაღმაიძის განმარტებით, კრიტერიუმების თანახმად პატრიარქი უნდა იყოს ქართველი, უნდა იყოს ბერი, სინოდის წევრი, უნდა ჰქონდეს განათლება, შესრულებული უნდა ჰქონდეს 40 წელი და იყოს არაუმეტეს 70 წლის.
იმედი
წყარო: imedinews.ge