საფრანგეთმა ნორვეგია 4:1 დაამარცხა და I ჯგუფში პირველი ადგილი დაიკავა

აშშ-ში, კანადასა და მექსიკაში მიმდინარე მსოფლიო საფეხბურთო ჩემპიონატზე I ჯგუფში გამართული შეხვედრის შედეგად საფრანგეთის ეროვნულმა ნაკრებმა ნორვეგია ანგარიშით 4:1 დაამარცხა.

აღსანიშნავია, რომ ნორვეგია მოედანზე სათადარიგო შემადგენლობით გავიდა, რადგან პლეი-ოფში გადასვლა უკვე განაღდებული ჰქონდა. ნორვეგიელთა თავკაცმა სტოლე სოლბაკენმა სათადარიგო სკამზე დასვა ნაკრების მთავარი ვარსკვლავი ერლინგ ჰოლანდი.

შეხვედრაში ანგარიში სწრაფად, მეშვიდე წუთზე გაიხსნა. გატანილი გოლის ავტორი უსმან დემბელე იყო. 21-ე წუთზე დემბელემ დუბლი გაიფორმა და ფრანგების უპირატესობა ორბურთიანი გახადა. ერთ წუთში ნორვეგიელებმა ერთი ბურთი გაქვითეს. გატანილი გოლის ავტორი თელო ასგაარდი იყო. მატჩის 32-ე წუთზე დემბელემ კვლავ აიღო ნორვეგიელთა კარი და ჰეთ-თრიკი გაიფორმა. მეორე ტაიმის დამატებით დროში ფრანგმა შემტევმა ნახევარმცველმა დეზირე დუემ ნორვეგიელთა კარი მეოთხედ აიღო და საბოლოო ანგარიში 4:1 დააფიქსირა.

სამი ტურის შედეგად, საფრანგეთის ნაკრებმა 9 ქულა დააგროვა და ჯგუფში პირველ ადგილზე გავიდა. მეორე ადგილზე ექვსი ქულით ნორვეგია განთავსდა, რომელიც აგრეთვე პლეი-ოფში გადავიდა. ჯგუფში მესამე ადგილი სენეგალის ეროვნულმა ნაკრებმა დაიკავა. სენეგალიც მუნდიალის შემდეგ სტადიაზე გადავიდა.