საპროცედურო საკითხთა კომიტეტმა „ზოგადი განათლების შესახებ“ კანონში ცვლილების შეტანის თაობაზე“ კანონპროექტის წარდგენის უფლების განხორციელების მიზნით შექმნილ საინიციატივო ჯგუფს სარეგისტრაციო მოწმობა გადასცა

საპროცედურო საკითხთა კომიტეტმა, არანაკლებ 25 000 ამომრჩევლის ინიციატივით, „ზოგადი განათლების შესახებ“ კანონში ცვლილების შეტანის თაობაზე“ კანონპროექტის წარდგენის უფლების განხორციელების მიზნით შექმნილი საინიციატივო ჯგუფის რეგისტრაციის საკითხი განიხილა.

როგორც კომიტეტის თავმჯდომარემ დავით მათიკაშვილმა განაცხადა, საინიციატივო ჯგუფის (აკაკი ჩიქობავას, ანა კამლაძის, გიორგი ქართველიშვილის, გიორგი ხასაიას, ეკატერინე დანელიას, ვახტანგ ნაცვლიშვილის, თათია ვერულაშვილის, ინა ჩარკვიანისა და კონსტანტინე ჩაჩიბაიას შემადგენლობით) მიერ წარდგენილი მასალები პარლამენტის რეგლამენტით დადგენილ მოთხოვნებს აკმაყოფილებს.

საპროცედურო საკითხთა კომიტეტის წევრებმა მიზანშეწონილად მიიჩნიეს საინიციატივო ჯგუფის რეგისტრაციაში გატარება. შესაბამისად, მას სარეგისტრაციო მოწმობა და საპროცედურო საკითხთა კომიტეტის მიერ კანონპროექტის მხარდამჭერთა ხელმოწერების შესაგროვებლად დადგენილი ფორმის ფურცლის ნიმუში გადაეცემა.

პარლამენტის რეგლამენტის თანახმად, საინიციატივო ჯგუფი სარეგისტრაციო მოწმობის მიღების დღიდან უფლებამოსილია კანონპროექტის მხარდამჭერთა ხელმოწერების შეგროვება დაიწყოს.