საქალაქო სასამართლოში 4 ოქტომბრის საქმეზე შვიდი ბრალდებულის სასამართლო პროცესი გადაიდო - დანაშაული კიდევ ერთმა ბრალდებულმა აღიარა

საქალაქო სასამართლოში 4 ოქტომბრის საქმეზე შვიდი ბრალდებულის სასამართლო პროცესი გადაიდო. განაჩენი, სავარაუდოდ, 19 ივნისს გამოცხადდება.

დანაშაული კიდევ ერთმა ბრალდებულმა აღიარა, შესაბამისად, მასთან საპროცესო შეთანხმება გაფორმდება. საქმე ეხება ზაქრო ალბუთაშვილს. მას მომდევნო პროცესზე სასამართლო დარბაზიდან გაათავისუფლებენ.

„ზაქრო ალბუთაშვილმა გუშინ მოგვმართა საპროცესო შეთანხმების გაფორმების თხოვნით, განცხადებაში მიუთითებდა, რომ სრულად აღიარებდა დანაშაულს. დღევანდელი პროცესისთვის ტექნიკურად ვერ მოესწრო საპროცესო შეთანხმების გაფორმება, თუმცა, ტექნიკური დეტალებია მხოლოდ დარჩენილი და აუცილებლად გაფორმდება ეს შეთანხმება. პირობები იგივეა რაც სხვა ბრალდებულებთან იყო - 3 წელი პირობითი მსჯავრი. რაც შეეხება სხვა ბრალდებულებს, მათ მიმართ განაჩენს, დიდი ალბათობით სასამართლო შემდეგ პარასკევს გამოაცხადებს“, - განაცხადა საქმის პროკურორმა.