საქართველოს კულტურულ მრავალფეროვნებას ITB China-ზე ანსამბლი „რუსთავი“ წარმოადგენს
საქართველო ITB China-ს ტურისტულ გამოფენაზე პარტნიორი ქვეყნის სტატუსით მიიღებს მონაწილეობას. ანსამბლი „რუსთავი“ შანხაიში, გამოფენის გახსნის დღეს, სტუმრებს ქართულ ფოლკლორულ ცეკვებსა და სიმღერებს წარუდგენს.
გამოფენის მნიშვნელობაზე ანსამბლ „რუსთავის“ დირექტორმა, ია მაქაცარიამ ისაუბრა.
„წელს საქართველო მსოფლიოს ერთ-ერთი უმსხვილესი ტურისტული გამოფენის, ITB China-ს პარტნიორი ქვეყანაა. ეს სტატუსი ქვეყნის კულტურული და ტურისტული პოტენციალის მასშტაბურად წარმოჩენას გულისხმობს. საქართველოსთვის გამოყოფილ სივრცეში ნაჩვენები იქნება ქვეყნის ტურისტული მრავალფეროვნება, ჩვენს კულტურულ სიმდიდრეს კი ITB China-ზე ანსამბლი „რუსთავი“ წარადგენს“, - განაცხადა მაქაცარიამ.
შანხაიში, გამოფენის დაწყებამდე, საქართველოს სახელით საზეიმო მიღება გაიმართება, რომელსაც 700-მდე მაღალი რანგის სტუმარი დაესწრება.
გამოფენის ოფიციალური გახსნა საქართველოს სტენდთან მაღალი რანგის დელეგატების ვიზიტით დაიწყება. სამი დღის განმავლობაში ეროვნული სტენდის ვიზიტორებს საშუალება ექნებათ, მიიღონ ამომწურავი ინფორმაცია საქართველოს ტურისტული მიმართულებების შესახებ.
იმედი
წყარო: imedinews.ge