საქართველოს ნაკრებმა უკრაინასთან მატჩის წინ რიგის არენაზე სრულად ივარჯიშა🏀

საქართველოს ეროვნულმა საკალათბურთო ნაკრებმა იურმალას მოსამზადებელი ეტაპი დაასრულა და უკრაინასთან ოფიციალური მატჩის წინ რიგაში, Xiaomi Arena-ზე პირველი ოფიციალური ვარჯიში გამართა.

საქართველოს კალათბურთის ფედერაციის ცნობით, ნაკრებს უკრაინასთან და ესპანეთთან მატჩებში ვერ დაეხმარება სანდრო მამუკელაშვილი. კალათბურთელი რამდენიმე დღის წინ თავისუფალი აგენტი გახდა და, NBA-ს რამდენიმე კლუბის მხრიდან ინტერესის მიუხედავად, ამ ეტაპზე უგუნდოდაა. აქედან გამომდინარე, მოქმედი საკლუბო კონტრაქტის არქონის გამო მისი დაზღვევა იურიდიულად შეუძლებელია.

შეკრებაზე 15 კალათბურთელი რჩება, საიდანაც მთავარი მწვრთნელი, ალეკსანდარ ჯიკიჩი იმ 12-ს შეარჩევს, რომლებიც 2 ივლისს, რიგაში უკრაინას დაუპირისპირდებიან. 5 ივლისს კი გუნდი თბილისში ესპანეთს უმასპინძლებს.