საქართველოს პროკურატურასა და ქუთაისის საერთაშორისო უნივერსიტეტს შორის ურთიერთთანამშრომლობის მემორანდუმი გაფორმდა

საქართველოს გენერალურმა პროკურორმა გიორგი გვარაკიძემ და ქუთაისის საერთაშორისო უნივერსიტეტის რექტორმა ვახტანგ ცაგარელმა, საქართველოს პროკურატურასა და ქუთაისის საერთაშორისო უნივერსიტეტს შორის ურთიერთთანამშრომლობის მემორანდუმს მოაწერეს ხელი.

პროკურატურის ინფორმაციით, მემორანდუმის ფარგლებში, მხარეები ერთობლივად დაგეგმავენ და განახორციელებენ ღონისძიებებს, რომლებიც ახალგაზრდებისთვის პრაქტიკული გამოცდილების მიღებასა და პროფესიული შესაძლებლობების გაფართოებას შეუწყობს ხელს.

მემორანდუმის ხელმოწერის შემდეგ საქართველოს გენერალური პროკურორი ქუთაისის საერთაშორისო უნივერსიტეტის სამართლის სკოლის სტუდენტებს შეხვდა. გიორგი გვარაკიძემ აღნიშნა, რომ საქართველოს პროკურატურა მზადაა, დამატებითი შესაძლებლობები მისცეს სტუდენტებს და სტაჟიორებს პრაქტიკული გამოცდილების მისაღებად, რაც სტუდენტებს სამომავლო კარიერული მიზნების ჩამოყალიბებაში კიდევ უფრო მეტად დაეხმარება. გენერალურმა პროკურორმა ასევე აღნიშნა, რომ ქუთაისის საერთაშორისო უნივერსიტეტთან მჭიდროდ ითანამშრომლებენ პროკურორები.

გიორგი გვარაკიძემ სტუდენტებს წარმატებები უსურვა და იმედი გამოთქვა, რომ მათი ნაწილი საქართველოს პროკურატურაში დასაქმდება.

„პროკურატურის კარი ღიაა ყველა ახალგაზრდა იურისტისთვის, რომელთაც შეუძლიათ სტაჟირების გზით დასაქმდნენ საქართველოს პროკურატურის სისტემაში. მოხარული ვიქნები, თუ თითოეულ თქვენგანს ვიხილავ პროკურატურის თანამშრომლად“, - განაცხადა გენერალურმა პროკურორმა.

მემორანდუმის ხელმოწერის შემდეგ, საქართველოს გენერალური პროკურატურის პროფესიული განვითარების ცენტრის უფროსმა მირიან მეგრელიშვილმა თემაზე - „პროკურორის უფლებამოსილებები სისხლის სამართლის პროცესში და საქართველოს პროკურატურის საქმიანობის პრიორიტეტული მიმართულებები“ ქუთაისის საერთაშორისო უნივერსიტეტის სამართლის სკოლის სტუდენტებისთვის საჯარო ლექცია ჩაატარა. მან ახალგაზრდების კითხვებს უპასუხა და სამომავლო თანამშრომლობის შესახებ გაამახვილა ყურადღება.

ქუთაისის საერთაშორისო უნივერსიტეტს საქართველოს გენერალური პროკურორი გიორგი გვარაკიძე, საქართველოს გენერალური პროკურორის პირველი მოადგილე ზურაბ ბელთაძე, მოადგილე გიგა ძნელაძე, საქართველოს გენერალური პროკურატურის პროფესიული განვითარების ცენტრის უფროსი მირიან მეგრელიშვილი, დასავლეთ საქართველოს საოლქო პროკურორი ზაზა მეტონიძე და აჭარის ავტონომიური რესპუბლიკის პროკურორი გიორგი ცხოვრებაძე ესტუმრნენ. მათ ქუთაისის საერთაშორისო უნივერსიტეტის აღმასრულებელმა დირექტორმა ვახტანგ ცაგარელმა, კანცლერმა ლევან კოპალიანმა, სამართლის სკოლის ხელმძღვანელმა დევი ხვედელიანმა, იურიდიული სამსახურის უფროსმა ხატია სამხარაძემ უმასპინძლეს და ვიზიტის ფარგლებში საუნივერსიტეტო ქალაქი დაათვალიერებინეს.