სებ-ის პირველი ვიცე-პრეზიდენტი ლონდონის საფონდო ბირჟისა და ბრიტანეთის საელჩოს წარმომადგენლებს შეხვდა
საქართველოს ეროვნული ბანკის პირველი ვიცე-პრეზიდენტი ეკატერინე მიქაბაძე ლონდონის საფონდო ბირჟის ევროპის მიმართულების ხელმძღვანელს აიუნა ნეჩაევას და ბრიტანეთის საელჩოს წარმომადგენლებს შეხვდა, - ინფორმაციას საქართველოს ეროვნული ბანკი ავრცელებს.
უწყების ცნობით, შეხვედრისას მხარეებმა განიხილეს საქართველოს სტაბილური მაკროეკონომიკური გარემო და წარმატებული მონეტარული პოლიტიკა, ასევე იმსჯელეს კაპიტალის ბაზრის განვითარების, ინვესტორებისთვის საქართველოს საინვესტიციო გარემოს წარმოჩენისა და ერთობლივი პროექტების განხორციელების პერსპექტივებზე, მათ შორის საქართველოს ეროვნულ ბანკსა და ლონდონის საფონდო ბირჟას შორის თანამშრომლობის გაღრმავების შესაძლებლობებზე.
„ეკატერინე მიქაბაძემ ხაზგასმით აღნიშნა, რომ საქართველოს ეროვნული ბანკი აქტიურად უწყობს ხელს ფინანსური ბაზრების განვითარებას, გამჭვირვალობისა და საუკეთესო საერთაშორისო პრაქტიკის დანერგვას, რაც ქვეყნის კაპიტალის ბაზრის შემდგომი გაძლიერებისა და უცხოური ინვესტიციების მოზიდვის მნიშვნელოვანი წინაპირობაა.
შეხვედრაზე ასევე აღინიშნა, რომ ქართული კომპანიები წარმატებით არიან წარმოდგენილნი ლონდონის საფონდო ბირჟაზე, რაც ქვეყნის ფინანსური სექტორის განვითარებისა და საერთაშორისო ფინანსურ ბაზრებზე ინტეგრაციის მნიშვნელოვანი დასტურია. განსაკუთრებით ხაზი გაესვა საქართველოს ბანკის მიერ FTSE 100 ინდექსში გაწევრიანებას, რაც საქართველოს კერძო სექტორისთვის მნიშვნელოვანი საერთაშორისო აღიარებაა.
მხარეებმა მომავალში თანამშრომლობის კონკრეტული მიმართულებების განსაზღვრისა და ერთობლივი ინიციატივების განხორციელებისთვის მზადყოფნა გამოთქვეს.
შეხვედრას ასევე ესწრებოდნენ სებ-ის სხვადასხვა მიმართულების ხელმძღვანელები“, - აღნიშნულია გავრცელებულ ინფორმაციაში.
იმედი
წყარო: imedinews.ge