სეუტის კრიზისის შემდეგ, ევროკომისიის პრეზიდენტი ესპანეთს მხარდაჭერას უცხადებს

ევროკომისიის პრეზიდენტი ურსულა ფონ დერ ლაიენი ესპანეთთან დაძაბულობის განმუხტვას შეეცადა მას შემდეგ, რაც პრემიერ-მინისტრმა პედრო სანჩესმა ევროკავშირის უამრავი კოლეგა სეუტაში არსებული მიგრაციული კრიზისის მისი მთავრობის წინააღმდეგ გამოყენებაში დაადანაშაულა.

ორშაბათს სანჩესისთვის გაგზავნილ წერილში ფონ დერ ლაიენმა შეაქო ესპანეთის ქმედებები მიგრანტების ნაკადის მართვასთან დაკავშირებით.

ევროკომისიის პრეზიდენტის პასუხს წინ უძღვოდა სანჩესის მიერ გასულ კვირას გაგზავნილი წერილი, სადაც ის გმობდა იმ ლიდერებს, რომლებმაც „გადაწყვიტეს ესპანეთზე თავდასხმა და შენგენის ზონიდან მისი დროებითი გარიცხვა მოითხოვეს“.

იტალიის პრემიერ-მინისტრი ჯორჯია მელონი პირველი იყო, ვინც 29 ქვეყნისგან შემდგარი შენგენის ზონიდან, სადაც შიდა სასაზღვრო კონტროლი დიდწილად გაუქმებულია, ესპანეთის წევრობის შეჩერების ინიციატივით გამოვიდა.

გასულ კვირას თავისუფალ გადაადგილებაზე შეზღუდვები იტალიამაც და საფრანგეთმაც დააწესეს.

ორშაბათს ფონ დერ ლაიენმა შეაქო ესპანეთისა და მაროკოს ხელისუფლების მიერ მიგრანტთა უკან დაბრუნების პროცესის „სწრაფი მართვა“ და აღნიშნა, რომ მათ „წარმატებით აღკვეთეს უკანონო გადაადგილება ესპანეთისა და ევროპის კონტინენტური ნაწილისკენ“.

„მიგრაცია ევროპული გამოწვევაა, რომელიც ევროპულ პასუხს მოითხოვს და ამ პროცესში სოლიდარობას ფუნდამენტური მნიშვნელობა აქვს“, - აღნიშნა მან.

მისი თქმით, ევროკომისიამ ესპანეთს ფინანსური და ოპერატიული მხარდაჭერა შესთავაზა, Frontex-ი, ევროპოლი და ევროკავშირის თავშესაფრის სააგენტო კი მზად არიან დახმარების გასაწევად.