შალვა გოგოლაძე: ყველა ახალგახსნილ საფეხბურთო მოედანზე ტევა არ არის ბავშვების, რადგან მათთვის მაგალითია ხვიჩა კვარაცხელია. ასეთი გმირები ახალისებენ სპორტს

ყველა ახალგახსნილ საფეხბურთო მოედანზე ტევა არ არის ბავშვების, რადგან მათთვის მაგალითია ხვიჩა კვარაცხელია, - განაცხადა სპორტის მინისტრმა შალვა გოგოლაძემ გადაცემაში „იმედი LIVE“.

მისი თქმით, ახალი სპორტული ინფრასტრუქტურა, ბევრი გმირი ჩემპიონი და საბოლოო ჯამში ერთ-ერთ ყველაზე სპორტულ ქვეყნად იქნება საქართველო წარმოჩენილი.

„სპორტის სამინისტრო შეიქმნა ირაკლი კობახიძის ინიციატივით. პირველი, რაც გავაკეთეთ, ერთ-ერთ დიდ ორგანიზაციას დავუკვეთეთ კვლევა, სადაც მთლიანად, საქართველოს მასშტაბით გამოიკვლია, რას საჭიროებს თითოეული რეგიონი. თითოეული მოსახლე როგორ ხედავდა თავიანთ რეგიონში სპორტულ ინფრასტრუქტურას, გამოწვევებს და ა.შ. შესაბამისად, სახელმძღვანელო გვაქვს და დაწყებული გვაქვს ათწლიანი განვითარების გეგმა.

ერთი კარგი რამ გამოჩნდა ამ კვლევის თანახმად. ჩვენი მოსახლეობის დაახლოებით 34% არის ჩართული ფიზიკურ აქტივობაში. გვაქვს ამბიცია, რომ 2030 წლისთვის, ჩვენი მოსახლეობის დაახლოებით 60% იყოს ჩართული სპორტში ეს არის მთავარი გამოწვევა და ამ კუთხითაც საქართველო იქნება მოწინავე, ვინაიდან ყველა ადამიანს მივცემთ იმის საშუალებას, რომ სპორტში ჩაერთოს. ამაში დიდი წვლილი მიუძღვით ჩვენს საამაყო სპორტსმენებს. მაგალითად გეტყვით, რომ ყველა ახალგახსნილ საფეხბურთო მოედანზე ტევა არ არის ბავშვების, რადგან მათთვის მაგალითია ხვიჩა კვარაცხელია. ასეთი გმირები ახალისებენ სპორტს. ახალი სპორტული ინფრასტრუქტურა, ბევრი ჩვენი გმირი ჩემპიონი და საბოლოო ჯამში ერთ-ერთ ყველაზე სპორტულ ქვეყნად იქნება ჩვენი ქვეყანა წარმოჩენილი“, - აღნიშნა გოგოლაძემ.