შალვა პაპუაშვილი 20 ოქტომბერს დაკავებულებზე: ეს არის ადამიანების ჯგუფი, რომელიც შიდა და გარე რადიკალებმა წააქეზეს დანაშაულზე, გაწირეს ციხისთვის, მიატოვეს ციხეში ეს ადამიანები

ეს არის ადამიანების ჯგუფი, რომელიც შიდა და გარე რადიკალებმა წააქეზეს დანაშაულზე, გაწირეს ციხისთვის, მიატოვეს ციხეში ეს ადამიანები, - განაცხადა პარლამენტის თავმჯდომარემ შალვა პაპუაშვილმა.

პაპუაშვილი 20 ოქტომბრის ინციდენტთან დაკავშირებით 10 პირისთვის საპროცესო გარიგების გაფორმებას ეხმაურება. ათივე დაკავებული ბრალს აღიარებს.

„მნიშვნელოვანია, რომ მოძალადეებმა აღიარეს საკუთარი დანაშაული და ინანიებენ, რომ საკუთარი ქვეყნის წინაშე ჩაიდინეს დანაშაული ძალადობით. მნიშვნელოვანია, რომ ეს 10 მოძალადე აღიარებს, რომ მათი მიზანი იყო პრეზიდენტის სასახლის ხელში ჩაგდება, რაც უკვე ყველანაირად ადასტურებს თუ რასთან გვქონდა საქმე და მნიშვნელოვანი არის იმ მხრივ, რომ წერტილი დაესმება ყველა იმ სპეკულაციას და პროპაგანდას, რომლებიც ცდილობდნენ, რომ შავი თეთრად წარმოეჩინათ და ძალადობა სიკეთედ, რასაც სამწუხაროდ აკეთებს ზოგიერთი უცხოეთიდან. ასე რომ მე ყველას მოვუწოდებდი, ამ მაგალითს მიბაძონ. საქართველოს ხელისუფლებამ განაცხადა, რომ სადაც იქნება სინანული იქ იქნება ადეკვატური რეაგირება ხელისუფლების სხვადასხვა შტოს მხრიდან, რა თქმა უნდა, დანაშაულის სიმძიმიდან გამომდინარე. ფაქტია, რომ ეს არის ადამიანების ჯგუფი, რომელიც შიდა და გარე რადიკალებმა წააქეზეს დანაშაულზე, გაწირეს ციხისთვის, მიატოვეს ციხეში ეს ადამიანები. მნიშვნელოვანია, რომ სხვებმაც ამ პროცესს შეხედონ, შესაბამისი დასკვნები გამოიტანონ და ითანამშრომლონ საქართველოს სახელმწიფოს და არა სახელმწიფოს მტრებთან“, - აღნიშნა პაპუაშვილმა.