შალვა პაპუაშვილი „ასავალ-დასავალზე“: პოლიტიკური განცხადებებით საქართველოში მართლმსაჯულებისთვის გვერდის ავლა ჯერ არავის გამოსვლია, ასე რომ მნიშვნელოვანია, ყველა კონცენტრირდეს სამართლებრივ საკითხებზე

საქართველოს პარლამენტის თავმჯდომარე შალვა პაპუაშვილმა „ასავალ-დასავალის“ მიერ ირაკლი ღარიბაშვილის შესახებ დაწერილ სტატიებზე მედიასთან ისაუბრა.

მისი თქმით, სასამართლო განხილვების პოლიტიზება და ამით ყურადღების გადატანა საქართველოში არავის გამოსვლია.

„პოლიტიზების მცდელობას ყველანაირად უნდა შევეწინააღმდეგოთ. ეს არის ტაქტიკა, რომ პოლიტიზება მოხდეს სისხლის სამართლებრივი საქმის, ბრალის და სამართლებრივი პროცესის და ამით ყურადღება მოდუნდეს მთავარ საკითხზე. რაც შეეხება მთავარ საკითხს - ბრალი არის წარდგენილი, ეს არის სამართლებრივი პროცესი და სამართლებრივ პროცესს სჭირდება სამართლებრივი პასუხები. პოლიტიკური განცხადებებით საქართველოში მართლმსაჯულებისთვის გვერდის ავლა ჯერ არავის გამოსვლია, ასე რომ მნიშვნელოვანია, ყველა კონცენტრირდეს სამართლებრივ საკითხებზე.

როცა საუბარია ადამიანზე, რომელმაც თვითმკვლელობით დაასრულა სიცოცხლე - ამ ადამიანმა მძიმე ცოდვები დაიდო, ცილი დასწამა და თავი მოიკლა. ის ადამიანები, რომლებიც მას იყენებენ როგორც იარაღად, სწორედ ისინი არიან მისი ყველაზე დიდი მტრები. ადამიანი ასეთი დამძიმებული წავიდა, და თუ რაიმეს სცემენ პატივს, ამ ადამიანის სული მოასვენონ. მძიმეა ამის ყურება, რომ ამ ყველაფრის შემდეგ ხდება გარდაცვლილი ადამიანით სპეკულირება“, - აღნიშნა პაპუაშვილმა.

როგორ ცდილობს „ასავალ-დასავალი" მსჯავრდებული ირაკლი ღარიბაშვილის პოლიტიკურ რეაბილიტაციას - უკანონო შემოსავლების ლეგალიზაციისთვის ბრალდებული ექსპრემიერის მიერ დანაშაულის აღიარების შემდეგ, გაზეთში აქტიურად იწერება სტატიები, რომლებიც, მმართველი გუნდის შეფასებით, დაკვეთილ კამპანიას ჰგავს.