შალვა პაპუაშვილი ღარიბაშვილის წერილებზე: ნებისმიერი შეყოლა პოლიტიკური კომენტარებით, ვფიქრობ, ქმნის ნიადაგს, რომ სამართლებრივი პროცესი გადავიდეს პოლიტიკურ განხილვაში. მე არ მინდა, რომ შევიდე ამაში. მიზანი სწორედ პოლიტიკურ ჭრილში გადასვლაა

მისი გადასაწყვეტია, რა კომუნიკაცია შეიძლება ჰქონდეს გარეთ - მედიასთან თუ საზოგადოებასთან, რა სიხშირით და რა შინაარსით, - განაცხადა შალვა პაპუაშვილმა მედიის წარმომადგენლის კითხვის პასუხად, თუ რატომ შეწყვიტა ირაკლი ღარიბაშვილმა ციხიდან წერილების გავრცელება.

საქართველოს პარლამენტის თავმჯდომარის თქმით, კითხვები, რომელიც არსებობს არის სამართლებრივი და ის არ შეუწყობს ხელს იმას, რომ პროცესი პოლიტიკურ ჭრილში გადავიდეს.

„ეს სამართლებრივი პროცესია და თუ რაიმე კითხვები არსებობს, არსებობს სამართლებრივი კითხვები და თუ რამე კითხვას პასუხი სჭირდება, სჭირდება სამართლებრივი პასუხები. ვფიქრობ, არ არის სწორი სამართლებრივი პროცესის გადაყვანა პოლიტიკურ ჭრილში და ამაში შესვლა უკვე გულისხმობს ამ პროცესის მხარდაჭერას.

ნებისმიერი შეყოლა პოლიტიკური კომენტარებით, ვფიქრობ, ქმნის ნიადაგს, რომ სამართლებრივი პროცესი გადავიდეს პოლიტიკურ განხილვაში. მე არ მინდა, რომ შევიდე ამაში. მიზანი არის სწორედ ის, რომ გადავიდეს პოლიტიკურ ჭრილში“, - განაცხადა შალვა პაპუაშვილმა.