შალვა პაპუაშვილი ირაკლი ღარიბაშვილის წერილზე: გარდაცვლილი ადამიანის ბოდვის გამოყენება პოლიტიკური მიზნებისთვის არასწორია, აქ უკვე ადამიანურ სტანდარტებზეა საუბარი

გარდაცვლილი ადამიანის ბოდვის გამოყენება პოლიტიკური მიზნებისთვის არასწორია, აქ უკვე ჟურნალისტურ სტანდარტებზე საუბარი აღარაა, აქ ადამიანურ სტანდარტებზეა საუბარი, - განუცხადა პარლამენტის თავმჯდომარემ შალვა პაპუაშვილმა მედიას.

პაპუაშვილი ირაკლი ღარიბაშვილის მორიგ წერილს გამოეხმაურა, სადაც ყოფილი პრემიერი ლაზარე ჯორბენაძის თვითმკვლელობის საეჭვო გარემოებებზე საუბრობს.

„ყველამ, მათ შორის „ასავალ დასავალის“ ჟურნალისტმაც იცის, რომ ეს [ლაზარე ჯორბენაძის ინტერვიუ] იყო ბოდვა, ცილისწამება, რომელიც იყო ბოდვის ხასიათის. ეს არის სწორედ ამორალურობა. თავის დროზე ბოდვა იყო და ამის ტირაჟირებას ცდილობდნენ და ახლა ეს ადამიანი ცოცხალი არ არის და ნაბოდვარს იყენებენ იმისთვის, რომ ტირაჟირება მოახდინონ. ეს არის აბსოლუტური უსინდისობა პირველ რიგში გარდაცვლილი ადამიანის მიმართ, როდესაც მის სულს არ ასვენებენ. გარდაცვლილი ადამიანის ბოდვის გამოყენება პოლიტიკური მიზნებისთვის არასწორია, აქ უკვე ადამიანურ სტანდარტებზეა საუბარი“, - აღნიშნა პაპუაშვილმა.

ჟურნალისტმა ჰკითხა, ფიქრობს თუ არა, რომ შესაძლოა ირაკლი ღარიბაშვილი უკვეთავდეს ამ ტიპის სტატიებს „ასავალ-დასავალს“.

„არ ვიცი ვინ ვის რას უკვეთს, მაგრამ გარდაცვლილი ადამიანის გამოყენება ვისი სტილიც არის, წლების განმავლობაში ვხედავთ. არ მგონია სწორი იყოს, რომ გარდაცვლილი ადამიანის, რომელმაც ცოდვები დაიდო თავის თავზე, სულის არ მოსვენება ხდება იმით, რომ მას იყენებენ ისინი, ვინც მის მეგობრებად აცხადებენ თავს. ხომ გახსოვთ ეს ადამიანი რას ამბობდა - საიდუმლო კოდები მაქვსო, სადღაც ჩუმად შევდივარ, რაღაც ფურცლები მაქვსო. ახლა კიდევ ადამიანები, რომლებიც ამ ადამიანის [ლაზარე ჯორბენაძის] მეგობრებს უწოდებენ თავს და სინამდვილეში ყველაზე დიდი მტრები არიან, ამბობენ, ეს ფურცლები შორიდან დაგვანახაო. ასეთ დონეზე როგორ შეიძლება ან ჟურნალისტიკა დაეშვას, ან ადამიანი?!“, - აღნიშნა პაპუაშვილმა.