შალვა პაპუაშვილი: ყოველ ჯერზე, როდესაც „ალდე“-ს მხრიდან იქნება რაიმე სახის პრეტენზია საქართველოს მიმართ, უნდა მივუტრიალდეთ და ვუთხრათ, რომ არიან ტერორისტების შემწყნარებლები და ახლა თუ რეაგირება არ ექნებათ, არიან ქსენოფობიის შემწყნარებელი ალიანსი

ყოველ ჯერზე, როდესაც „ალდე“-ს მხრიდან იქნება რაიმე სახის პრეტენზია საქართველოს მიმართ, უნდა მივუტრიალდეთ და ვუთხრათ, რომ არიან ტერორისტების შემწყნარებლები და ახლა თუ რეაგირება არ ექნებათ, არიან ქსენოფობიის შემწყნარებელი ალიანსი, - განაცხადა ჟურნალისტებთან საქართველოს პარლამენტის თავმჯდომარემ.

შალვა პაპუაშვილმა „ალდე“-ს წევრი „ლელოს“ მიერ წარმოებულ ქსენოფობიურ კამპანიაზე ისაუბრა.

„მე სპეციალურად მაქვს ხოლმე რეაქცია ასეთ მომენტებზე, ვინაიდან საჭიროა, რომ ეს მომენტები მოინიშნოს და ყველამ დავიმახსოვროთ. ეს აჩვენებს ერთ რამეს, რომ როცა ჩვენ გარკვეული ჯგუფები ევროპულ ღირებულებებზე გვესაუბრებიან, ქართულმა საზოგადოებამ უნდა იცოდეს, რომ ეს ჯგუფები ახლოსაც არ არიან გავლილი არა თუ ევროპულ, ადამიანურ ღირებულებებთანაც კი. „ალდეზე“-ზე როცა ვსაუბრობთ, მათ დღეს თავის წევრებში და წრეში ჰყავთ პარტია „ლელო“, რომელიც ტერორისტის თანამებრძოლი არის. არ დაგმეს, არ გაემიჯნნენ, არ გარიცხეს, მიიღეს შემდეგი ეტაპი.

დღეს ვნახეთ ქსენოფობიური კამპანია, რომელშიც „ლელო“ ჩაერთო სლოგანით „არაბიზაცია“, რაც თავისთავად, ერთი მხრივ არის აბსოლუტური ტყუილი და სიცრუეზე დაფუძნებული კამპანია, მაგრამ ეს არის ყველაზე აღმაშფოთებელი, რომ სიცრუის კამპანიას აძლევენ მათ შორის, ქსენოფობიურ ელფერს.

ასე რომ, ვნახოთ ახლა, იქნება თუ არა რაიმე რეაქცია „ალდე“-ს მხრიდან. „ალდე“-ს ოფიციალურად გაცხადებული აქვს, ის გახლავთ ლიბერალური პარტია და ოფიციალურად აქვთ გაცხადებული, რომ ქსენოფობია და ეთნიკური დაყოფა არის ის, რასაც ისინი ებრძვიან. ახლა აღმოჩნდა, რომ არა თუ ებრძვიან, მათი წევრი არის ქსენოფობიური კამპანიის ავტორი. ეს მეორე შანსი არის მათთვის, რომ გაემიჯნონ ამ პარტიას. თუ არ გაემიჯნებიან, ჩვენ უბრალოდ, ვიცოდეთ, რომ ეს პარტია და ალიანსი, რომლის ლიდერები არიან სხვათა შორის, არიან კაია კალასი, მარტა კოსი, არის შემწყნარებელი ქსენოფობიის მიმართ.

ასე რომ, დაველოდებით კიდევ რამდენიმე დღე, რამე რეაქცია იქნება თუ არა და აქედან უკვე საზოგადოება ჩვენს დასკვნას გამოვიტანთ. ყოველ ჯერზე, როდესაც „ალდე“-ს მხრიდან იქნება რაიმე სახის პრეტენზია საქართველოს მიმართ, უნდა მივუტრიალდეთ და ვუთხრათ, რომ არიან ტერორისტების შემწყნარებლები და ახლა თუ რეაგირება არ ექნებათ, არიან ქსენოფობიის შემწყნარებელი ალიანსი“, - განაცხადა პაპუაშვილმა.

დღეს პარლამენტის თავმჯდომარემ აღნიშნულ საკითხზე ვრცელი პოსტი გამოაქვეყნა.