შალვა პაპუაშვილი: როდის იყო „ლელო“ სხვაგან, გვარამია სხვაგან ან მელია სხვაგან?! ეს არის მარგინალების ერთი ჯგუფი. როდესაც შენი ქვეყნის წინააღმდეგ მიდიხარ, მაშინ ხარ ყორღანაშვილი

საქართველოს პარლამენტის თავმჯდომარემ შალვა პაპუაშვილმა ოპოზიციის დაპირისპირებაზე მედიასთან ისაუბრა. მან ასევე კომენტარი გააკეთა ნიკა გვარამიას ინიციატივაზე, რომ „ლელო“ და გახარიას პარტია შეუერთდნენ ოპოზიციის გაერთიანებას.

„როდის იყო „ლელო“ სხვაგან, გვარამია სხვაგან ან მელია სხვაგან?! ეს არის მარგინალური ადამიანების ერთი ჯგუფი. აქ რაოდენობას მნიშვნელობა არ აქვს, მარგინალი ნიშნავს, რომ ის არის საზოგადოების ისტორიული კონტექსტიდან ამოვარდნილი. ეს არის ერთი ჯგუფი, რომელსაც ერთადერთი მიზანი აქვს - უცხოელმა შეაქოს. აქამდე დეგრადირდა ადამიანების ჯგუფი, რომ არა თუ პატრიოტიზმსა და სამშობლოს სიყვარულზე არის შესაძლებელი მათთან საუბარი, არამედ ადამიანებს თვალები აქვთ დაბნელებული, რომ უცხოელმა შეაქოს, ინგლისურად გაიგონ რამდენიმე საქებარი სიტყვა, ამის იქით არაფერი აინტერესებთ, რა დაემართება ჩვენს ქვეყანას.

მათი მთავარი პრობლემა არის, რომ გადადგეს ღალატის ნაბიჯი და როცა ღალატში შევა ადამიანი, ვიცით რა შედეგები აქვს ამას. როდესაც შენი ქვეყნის წინააღმდეგ მიდიხარ და სხვის ინტერესებს ითვალისწინებ, მაშინ ხარ ყორღანაშვილი“, - აღნიშნა შალვა პაპუაშვილმა.