შალვა პაპუაშვილი: როგორც შავი ზღვის ეკონომიკური თანამშრომლობის ორგანიზაციის საპარლამენტო ასამბლეის პრეზიდენტი, მონაწილეობას მივიღებ ხმელთაშუა ზღვის საპარლამენტო ასამბლეის წევრი და პარტნიორი ქვეყნების თავმჯდომარეების პირველ სამიტში

დღეიდან დაიწყო საპარლამენტო დელეგაციის ვიზიტი მონტენეგროში. ამ შემთხვევაში როგორც შავი ზღვის ეკონომიკური თანამშრომლობის ორგანიზაციის საპარლამენტო ასამბლეის პრეზიდენტი, მონაწილეობას მივიღებ ხმელთაშუა ზღვის საპარლამენტო ასამბლეის წევრი და პარტნიორი ქვეყნების თავმჯდომარეების რიგით პირველ სამიტში, - განაცხადა საქართველოს პარლამენტის თავმჯდომარემ შალვა პაპუაშვილმა.

მისი თქმით, შესაძლებლობა ექნება შეხვდეს კოლეგა პარლამენტების თავმჯდომარეებს.

„გამოსვლის ფარგლებში ვისაუბრებ რეგიონული თანამშრომლობის მნიშვნელობაზე შავი ზღვის ქვეყნების გამოცდილებით და მნიშვნელოვანია ამ მხრივ ხმელთაშუა ზღვის საპარლამენტო ასამბლეასთან გვქონდეს გამოცდილების გაზიარების და რეგიონული თანამშრომლობის საკითხებზე საუბრის შესაძლებლობა.

ვფიქრობ, რომ რეგიონული თანამშრომლობის ფორმატები კიდევ უფრო სასარგებლოა, ვიდრე გლობალური გაერთიანებები, ვინაიდან რეგიონული სპეციფიკაციის გათვალისწინებით უფრო ადვილია აუხსნა კოლეგებს თუ რა გარემოებებში ვითარდება ქვეყანა. მექნება შეხვედრა ასამბლეის წევრი ქვეყნების პარლამენტის თავმჯდომარეებთან. გვექნება შესაძლებლობა ვისაუბროთ ევროკავშირ-ნატოს საკითხებზეც, ვინაიდან ეს ქვეყნები გახლავთ ამ ორგანიზაციის წევრები“, - აღნიშნა შალვა პაპუაშვილმა.

პარლამენტის თავმჯდომარემ ასევე თქვა, რომ საშუალება ექნებათ ისაუბრონ კანდიდატ ქვეყნებთან, მათ გამოცდილებაზე კანდიდატობასთან დაკავშირებით და რა გამოწვევებს ხედავენ ისინი.

„ცოტა ხნის წინ სტამბოლში შეხვედრების დროსაც კანდიდატ ქვეყნებთან, ჩვენ ბევრი საერთო ვნახეთ, თუ რა გამოწვევები არის ამ მხრივ, როდესაც ხანგრძლივ გზაზე ბევრია მოთხოვნები და ცოტაა დაპირებების შესრულება“, - განმარტა პაპუაშვილმა.