შალვა პაპუაშვილი: რომ არა ხელისუფლების სწორი პოლიტიკა, შეუძლებელი იქნებოდა მშვიდობის შენარჩუნება. ჩვენ განადგურების კალაპოტიდან, მშვიდობის კალაპოტზე გადავიყვანეთ ქვეყანა

სოხუმის დაცემის დღეს ვიხსენებთ ჩვენს გმირ ჯარისკაცებს, რომლებიც აფხაზეთის ომში გმირულად დაიღუპნენ, ვიხსენებთ მშვიდობიან მოსახლეობას, რომელიც შეეწირა ამ ომს, - განაცხადა საქართველოს პარლამენტის თავმჯდომარე შალვა პაპუაშვილმა.

მისი თქმით, ომებმა წლების განმავლობაში შეაფერხა ქვეყნის განვითარება და მნიშვნელოვანია მშვიდობის მნიშვნელობის გააზრება.

„ამ დღეს ამავე დროს ვიხსენებთ იმ ომებისა და დაპირისპირებებს, რომლებმაც წლების განმავლობაში ჩვენი ქვეყნისა და საზოგადოების განვითარება შეაფერხა და ამ გადმოსახედიდან კიდევ უფრო მნიშვნელოვანია გავიაზროთ მშვიდობის მიზანი და მნიშვნელობა. ის რომ ჩვენ ამდენი ომები და დაპირისპირება გადავიტანეთ, ამან ქვეყანა ათეულობით წლებით უკან დახია განვითარების გზაზე და ამიტომ განსაკუთრებული მნიშვნელობა აქვს რომ ხალხი და ხელისუფლება ბოლო 14 წელია უწყვეტ მშვიდობას ინარჩუნებს. საქართველოს დამოუკიდებლობის პერიოდში ოთხი ხელისუფლებიდან სწორედ ქართული ოცნების ხელისუფლებამ შეძლო საქართველოში უწყვეტი მშვიდობის შენარჩუნება, ეს ჩვენი ისტორიიდან გამომდინარე გვაფიქრებს იმაზე, რომ ეს არ არის ბუნებრივი მოცემულობა, საკმარისია გავიხედოთ ჩვენ გარშემო რა ხდება, მიხვდებით, რომ, რომ არა ხელისუფლების სწორი პოლიტიკა, შეუძლებელი იქნებოდა მშვიდობის შენარჩუნება. ჩვენ საქართველოს განადგურების კალაპოტიდან მშვიდობის კალაპოტზე გადავიყვანეთ ჩვენი ქვეყანა“, - აღნიშნა პაპუაშვილმა.