შალვა პაპუაშვილი: ვნახეთ ფეხბურთელებზე თავდასხმა პოლიტიკური მოტივაციით - ფაშიზმი სხვა რამ კი არ არის, ეს არის ადამიანების გამოყოფა გარკვეული ნიშნით, ამ ნიშნით ცალკეული ჯგუფისთვის მიკუთვნება და შემდეგ ამ ჯგუფზე თავდასხმა

როდესაც ყალიბდება სექტა, შეუძლებელია, რომ საზოგადოების მნიშვნელოვანი ნაწილი მიიმხრონ იმიტომ, რომ ჩვენ ვხედავთ, ეს არის აგრესიული, ფუნდამენტალისტური სექტა, რომელსაც სამყარო დაყოფილი აქვს თავისიანებად და სხვებად, ვხედავთ ჩვენ თავდასხმებს მათზე, ვისაც თავისიანებად არ თვლიან, - განაცხადა მედიასთან საქართველოს პარლამენტის თავმჯდომარემ ქუჩის პროტესტის შესახებ.

შალვა პაპუაშვილმა აღნიშნა, რომ ამ საკითხზე მისი ფეისბუქპოსტის შემდეგაც საზოგადოებამ არაერთი ნიშანი და მტკიცებულება იხილა იმის, თუ რატომ არის ეს ჯგუფი სექტანტური აზროვნების.

„ამ პოსტის შემდეგ, ამ დღეებში კიდევ რამდენი მტკიცებულება იყო კიდევ წარმოდგენილი - ფეხბურთელებზე თავდასხმა პოლიტიკური მოტივაციით. ვინმე იმაზე კი არ საუბრობს, სწორი იყო თუ არა საფეხბურთო ტაქტიკა, რომელმა მოთამაშემ ძლიერად ითამაშა თუ სუსტად. პირდაპირ არის პოლიტიკური ნიშნით ადამიანებზე თავდასხმა.

ფაშიზმი სხვა რამ კი არ არის - ეს არის ადამიანების გამოყოფა გარკვეული ნიშნით, ამ ნიშნით ცალკეული ჯგუფისთვის მიკუთვნება და შემდეგ ამ ჯგუფზე თავდასხმა.

ასე რომ, ჩვენ რასაც ვაკვირდებით, ეს არის, ამ პოსტის შემდეგაც ყოველ დღე ვხედავთ ნიშნებს, თუ რატომ არის უპირველეს ყოვლისა, ადამიანთა ეს ჯგუფი სექტანტური აზროვნების და და რატომ არის ეს აგრესიული და ფუნდამენტალისტური სექტა”, - განაცხადა პაპუაშვილმა.