შსს-ს იურიდიული დეპარტამენტის დირექტორი: ჯარიმა არ არის ერთადერთი გამოსავალი. ზოგადად მკაცრი რეაგირება არ ახდენს გავლენას საგზაო მოძრაობის უსაფრთხოებაზე. ეს არის კომპლექსური საკითხი და სისტემურ მიდგომებს საჭიროებს

ჯარიმა არ არის ერთადერთი გამოსავალი. ზოგადად მკაცრი რეაგირება არ ახდენს გავლენას საგზაო მოძრაობის უსაფრთხოებაზე. ეს არის კომპლექსური საკითხი და სისტემურ მიდგომებს საჭიროებს, - განაცხადა „დღის ქრონიკასთან“ შინაგან საქმეთა სამინისტროს იურიდიული დეპარტამენტის დირექტორმა, ლანა ცანავამ.

მისი თქმით, მნიშვნელოვანია, რომ საგზაო მოძრაობის უსაფრთხოება რეგულირებული იყოს კომპლექსური მიდგომით.

„სახელმწიფომ კომპლექსურად უნდა იმუშაოს. ჯარიმა არ არის ერთადერთი გამოსავალი, მაგრამ ვერც იმას გამოვრიცხავთ, რომ ზოგადად მკაცრი რეაგირება არ ახდენს გავლენას საგზაო მოძრაობის უსაფრთხოებაზე. შესაბამისად, როდესაც პირველ მაისს შესული ცვლილებების შემდეგ გავა გარკვეული დრო, მოგვეცემა შესაძლებლობა, რომ შევადაროთ პირველ მაისამდე რა რაოდენობის გვქონდა სტატისტიკა კონკრეტულ სამართალდარღვევებთან დაკავშირებით და პირველი მაისის შემდეგ რა რაოდენობა გვექნება. ამის მიხედვით რა თქმა უნდა კიდევ ერთხელ შევადარებთ. ჯარიმას ერთი თვისება გააჩნია, ეს არის ფინანსური ტვირთი. ზოგიერთ ადამიანთან მიმართებაში შესაძლებელი მას შეეძლოს ამის გადახდა, ან არიან ადამიანები, რომელთა სახელზე არანაირი ქონება არ არის რეგისტრირებული და შესაბამისად, ჯარიმის დაკისრებას არანაირი მნიშვნელობა არ გააჩნია, იმის გათვალისწინებით, რომ მასზე ჯარიმის აღსრულება ვერასდროს განხორციელდება. ამიტომ ხანდახან შესაძლოა უფრო ეფექტური იყოს ადმინისტრაციული პატიმრობა, მართვის მოწმობის შეჩერება, ქულათა სისტემის კლება და ა.შ. ამიტომ ეს არის კომპლექსური საკითხი და სისტემურ მიდგომებს საჭიროებს. მხოლოდ ერთ ჯარიმაზე საგზაო უსაფრთხოების დაშენება ვერ მოხდება“, - განაცხადა ლანა ცანავამ.

ცნობისთვის, სიჩქარის გადაჭარბებისთვის დადგენილი ადმინისტრაციული ჯარიმები მცირდება.

საპარლამენტო უმრავლესობის ლიდერმა ირაკლი კირცხალიამ საზოგადოებას სიჩქარის გადაჭარბებისთვის დადგენილი ადმინისტრაციულ პასუხისმგებლობასთან დაკავშირებული ცვლილებები გააცნო.