შვეიცარიის ნაკრები მსოფლიო ჩემპიონატის მეოთხედფინალში 1954 წლის შემდეგ პირველად გავიდა

აშშ-ში, კანადასა და მექსიკაში მიმდინარე ფეხბურთის მსოფლიო ჩემპიონატზე მეოთხედფინალის კიდევ ერთი მონაწილე გამოვლინდა. ვანკუვერში გამართულ მერვედფინალურ დაპირისპირებაში შვეიცარიის ნაკრებმა კოლუმბია პენალტების სერიაში დაამარცხა.

შეხვედრის ძირითადი და დამატებითი დრო უგოლოდ, ფრედ დასრულდა. თერთმეტმეტრიანების სერიაში კი უფრო ზუსტები შვეიცარიელები აღმოჩნდნენ, რომლებმაც მეტოქე ანგარიშით 4:3 დაამარცხეს.

ამ გამარჯვებით შვეიცარიის ნაკრებმა თავისი ისტორიული მაქსიმუმი გაიმეორა - გუნდი მსოფლიო ჩემპიონატის მეოთხედფინალში 1934, 1938 და 1954 წლების შემდეგ პირველად გავიდა. რაც შეეხება კოლუმბიას, მათთვის ეს ეტაპი ისტორიაში მხოლოდ ერთხელ, 2014 წელს იყო დაპყრობილი.

მომდევნო ეტაპზე შვეიცარიელები 11 ივლისს, კანზას-სიტიში, არგენტინის ნაკრებს დაუპირისპირდებიან. შეგახსენებთ, რომ მსოფლიო პირველობა 19 ივლისს დასრულდება.