სიცხის გამო ეიფელის კოშკი 10 სანტიმეტრით გაიზარდა

ეიფელის კოშკი სიცხის გამო დაახლოებით 10 სანტიმეტრით გაიზარდა, - წერს RTL-ი არქიტექტორ ბერტრან ლემუანზე დაყრდნობით. მისი თქმით, კოშკი მგრძნობიარეა მაღალი ტემპერატურის მიმართ, რის გამოც წლის განმავლობაში მისი სიმაღლე შეიძლება შეიცვალოს.

„როდესაც ტემპერატურა -10-დან +40 გრადუსამდე იცვლება, ეიფელის კოშკი დაახლოებით 10 სანტიმეტრით იზრდება. ეს შეესაბამება 2 სანტიმეტრს ყოველ 10 გრადუსზე“, - განმარტა ლემუანმა.

ეიფელის კოშკის კონსტრუქციაში გამოყენებულია პუდლინგური რკინა, რომელიც სითბოს ზემოქმედებით ფართოვდება, ხოლო ტემპერატურის კლებისას ისევ იკუმშება. ლემუანმა აღნიშნა, რომ ეს მოვლენა ადამიანის თვალისთვის შეუმჩნეველი რჩება.

მან ასევე განმარტა, რომ გრძელვადიან პერსპექტივაში, კლიმატის ცვლილებით გამოწვეულ ძლიერ სიცხეს შესაძლოა კოშკზე გავლენა ჰქონდა.

„ლითონის ცვეთას 800-დან 1000 წლამდე სჭირდება. „წლების განმავლობაში დეტალების შეცვლა, რა თქმა უნდა, აუცილებელი გახდება“, - დასძინა ლემუანმა.

ანომალიურმა სიცხემ საფრანგეთი, ისევე, როგორც ევროპის რამდენიმე სხვა ქვეყანა, რამდენიმე დღის წინ მოიცვა.