სომხეთის ცენტრალური ბანკის ინფორმაციით, სომხური პროდუქციის საერთო ღირებულება, რომელზეც რუსეთმა ემბარგო დააწესა, მშპ-ის 2%-ს შეადგენს
სომხური პროდუქციის საერთო ღირებულება, რომელზეც რუსეთმა ემბარგო დააწესა, სომხეთის მთლიანი შიდა პროდუქტის 2%-ს შეადგენს. ინფორმაციას სომხური მედია სომხეთის ცენტრალური ბანკის მმართველზე მარტინ გალსტიანზე დაყრდნობით ავრცელებს.
როგორც გალსტიანმა აღნიშნა, თუ სომხური პროდუქციის ექსპორტი შემცირდება, სურსათი სომხეთში დარჩება, რაც ფასების შემცირებას გამოიწვევს.
მისი თქმით, თუ სომეხი მწარმოებლები სხვა ბაზრებზე გადართვას მოახერხებენ, რუსეთის მიერ დაწესებული ემბარგოს ზემოქმედება შემსუბუქდება.
ცნობისთვის, რუსეთმა მაისის ბოლოდან სომხური პროდუქციის იმპორტზე აკრძალვის დაწესება დაიწყო. რუსეთში და რუსეთის გავლით ევრაზიული ეკონომიკური კავშირის სახელმწიფოებში აიკრძალა ისეთი პროდუქციის შეტანა, როგორიცაა სომხური მინერალური წყალი „ჯერმუკი“, ხილი, ბოსტნეული, მწვანილი, ალკოჰოლური სასმელები.
იმედი
წყარო: imedinews.ge