სომხეთში საარჩევნო დანაშაულების ფაქტებზე სისხლის სამართლის წარმოება 59 საქმეზეა დაწყებული
სომხეთის საგამოძიებო კომიტეტის ცნობით, საარჩევნო დანაშაულების ფაქტებზე სისხლის სამართლის წარმოება 59 საქმეზეა დაწყებული. მათგან 43 რეგიონულ, 16 კი ერევნის საგამოძიებო დანაყოფებში. გავრცელებული ცნობით, სისხლის სამართლის 9 საქმე საარჩევნო უფლების ან რეფერენდუმში მონაწილეობის უფლების, ასევე საარჩევნო კომისიების მუშაობისა და არჩევნებში/რეფერენდუმში მონაწილე პირთა უფლებებისა და მოვალეობების შესრულებისთვის ხელის შეშლის მუხლითაა აღძრული.
30 საქმე ერთზე მეტჯერ, ან სხვის ნაცვლად ხმის მიცემის, 17 კი ხმის მიცემის საიდუმლოების დარღვევისთვის აღიძრა. სამ საქმეზე სისხლის სამართლის წარმოება დაწყებულია ტერორისტული აქტის შესახებ ცრუ ინფორმაციის გავრცელებისთვის. სისხლის სამართლის წარმოებათა ფარგლებში დაკავებულია 9 ადამიანი.
ანტიკორუფციული კომიტეტის ცნობით, გამოვლინდა და განეიტრალდა დაახლოებით 45 ამომრჩევლისთვის, საერთო ჯამში, 7,5 მილიონი სომხური დრამის ოდენობის საარჩევნო ქრთამის მიცემის დანაშაულებრივი სქემა, დაკავებულია 7 ადამიანი.
უწყებამ ამომრჩეველთა მოსყიდვის კიდევ ერთი სქემა გამოავლინა, რომლის მიხედვითაც სამველ კარაპეტიანის პარტია „ძლიერი სომხეთის“ მხარდამჭერები, სხვა პირებთან ერთად, რუსეთის ფედერაციაში მცხოვრებ სომხეთის ორ მოქალაქეს დაკავებულთა გათავისუფლებას ჰპირდებოდნენ, რომლებიც რუსეთში ნარკოტიკული საშუალებების შენახვისთვის არიან მსჯავრდებულნი. აღნიშნულ ფაქტზე დაწყებული სისხლის სამართლის საქმის ფარგლებში დაკავებულია რამდენიმე ადამიანი.
