სოფლის მეურნეობის კომიტეტმა „ვაზისა და ღვინის შესახებ“ კანონში ცვლილების თაობაზე კანონპროექტი მეორე მოსმენით განიხილა

პარლამენტის სოფლის მეურნეობის კომიტეტმა სხდომაზე „ვაზისა და ღვინის შესახებ“ საქართველოს კანონში ცვლილების შეტანის თაობაზე“ კანონპროექტზე მეორე მოსმენით იმსჯელა და მის პლენარულ სხდომაზე განხილვას მხარი დაუჭირა.

კანონში შესატან ცვლილებებზე გარემოს დაცვისა და სოფლის მეურნეობის მინისტრის მოადგილემ ზურაბ ეზუგბაიამ ისაუბრა.

ზურაბ ეზუგბაიას თქმით, კანონპროექტის პირველის მოსმენისას გამოთქმული შენიშვნები და რეკომენდაციები წარმოდგენილ რედაქციაში სრულად აისახა.

მინისტრის მოადგილის განცხადებით, კანონპროექტის მიღების შედეგად გარკვეული ტერმინები დაიხვეწება და მას ახალი განმარტებები დაემატება.

მისივე თქმით, კანონპროექტით ორი მექანიზმი - ალკოჰოლური სასმელების სპეციალური ნიშანდება და სავალდებულო დეგუსტაცია შემოდის, რომელიც როგორც საექსპორტო, ასევე, ადგილობრივ სამომხმარებლო ბაზარზე სარეალიზაციოდ განკუთვნილი ღვინის ყველა კატეგორიაზე გავრცელდება.

სხდომაზე სოფლის მეურნეობის კომიტეტის თავმჯდომარემ გელა სამხარაულმა საორგანიზაციო საკითხზე ისაუბრა, რომელიც ქართული მთის ლუდისთვის არამატერიალური კულტურული ძეგლის სტატუსის მინიჭების საკითხს და ამ თემასთან დაკავშირებით კომიტეტის სამუშაო ჯგუფის შექმნას შეეხებოდა.