სტივენ ჯერმი: საინტერესოა, ევროკავშირი თუ იარსებებს იმდენ ხანს, რომ უკრაინა მიიღოს საკუთარ რიგებში. წლებია, ვფიქრობ, რომ ევროკავშირი დაიშლება, რადგან საკუთარ თავში დიდ წინააღმდეგობას მოიცავს

საინტერესოა, ევროკავშირი თუ იარსებებს იმდენ ხანს, რომ უკრაინა მიიღოს საკუთარ რიგებში. წლებია, ვფიქრობ, რომ ევროკავშირი დაიშლება, რადგან საკუთარ თავში დიდ წინააღმდეგობას მოიცავს, - განაცხადა გადაცემაში „თბილისის დროით“ დიდი ბრიტანეთის სამეფო სამხედრო-საზღვაო ძალების ექს-კომოდორმა, სტივენ ჯერმიმ.

გადაცემის წამყვანმა, დიპლომატმა, გლობალური კრიზისების მართვის ექსპერტმა, იან პრაუდმა მას კითხვით მიმართა, რამდენად რეალურად მიაჩნია მას უკრაინის ევროკავშირში გაწევრიანება.

„ევროპა ამჟამად განსაკუთრებით მოწყვლადია. დიდ პოლიტიკურ ცვლილებებს ვხედავ შემდეგ წელს პოლონეთის, საფრანგეთის, გერმანიისა და ბრიტანეთის არჩევნებში. ამ ფონზე კიდევ უფრო საინტერესოა გაფართოების დღის წესრიგი. ამ მოცემულობით კიდევ უფრო გააქტიურდებიან ევროკავშირის გამყოფი ძალები. მიუხედავად ამისა, ბრიუსელი აგრძელებს ევროკავშირის გაფართოების პოლიტიკას და ამავე დროს ისეთ სახელმწიფოებს როგორიც საქართველოა, რომელიც ბიზნესისთვის მიმზიდველია, ნაკლებად სყალობს. ყველაზე დიდი პრობლემა მაინც უკრაინაა. ევროპას უკრაინა ძალიან ძვირი უჯდება როგორც ფინანსური, ასევე პოლიტიკური თვალსაზრისით. რამდენად რეალური გგონიათ უკრაინის ევროკავშირში გაწევრიანება?“, - მიმართა პრაუდმა ჯერმის.

ექსპერტის თქმით, საინტერესოა, ევროკავშირი თუ იარსებებს იმდენ ხანს, რომ უკრაინა მიიღოს საკუთარ რიგებში.

„ბევრი წელია, რაც ვფიქრობ, რომ ევროკავშირი დაიშლება. ის დაიშლება, რადგან დიდ წინააღმდეგობას მოიცავს საკუთარ თავში. ევროკავშირს ესაჭიროება ერთიანი ფისკალური და მონეტარული ჩარჩო ეკონომიკის მართვისთვის. ასევე, საჭიროა პოლიტიკური ერთიანობაც, ეს კი ეროვნული სახელმწიფოების მოშლას ნიშნავს, რაც არასოდეს მოხდება.

შესაბამისად, შეუძლებელია ეკონომიკის ისე მართვა, რომ ეს გამოვიდეს. ევროკავშირისთვის დიდი პრობლემაა ევროც. ამ სისტემას აქვს საბანკო მიდგომა, რაც გულისხმობს ერთი ვალუტის დაბალანსებას სხვადასხვა ქვეყანაში. ევროკავშირის სამხრეთ სახელმწიფოებს კი ამჟამად ევროკავშირის ჩრდილოეთ სახელმწიფოების დიდი ვალი აქვთ, დაახლოებით 1 ტრილიონ 300 მილიონი ევროს სახით. არა მგონია, რომ ეს ვალი როდისმე დაიფაროს. ამ მოცემულობას შესაძლოა, მეტხანს გაეძლო, რომ არ იყოს გერმანიაში ამჟამინდელი ვითარება - გერმანია ხომ ევროპის ბანკია. როგორც კი გერმანიაში რეცესია დაიწყება და ამის ნიშნებს უკვე ვხედავთ, ბერლინი თავს შეიკავებს ევროკავშირის სხვა სახელმწიფოების დაფინანსებისგან. ევროკავშირის ბედი იქნება სასწორზე. ევროკავშირის ბევრი წევრი სახელმწიფო სხვა მიმართულებით დაიწყებს ყურებას“, - განაცხადა სტივენ ჯერმიმ.