თამარ იოსელიანი ავიაკომპანია Turkish Airlines-ის დირექტორთა საბჭოსა და აღმასრულებელი კომიტეტის თავმჯდომარეს, მურატ შექერს შეხვდა

ეკონომიკისა და მდგრადი განვითარების მინისტრის მოადგილე თამარ იოსელიანი თურქეთში ვიზიტის ფარგლებში ავიაკომპანია Turkish Airlines-ის დირექტორთა საბჭოსა და აღმასრულებელი კომიტეტის თავმჯდომარეს, მურატ შექერს შეხვდა.

შეხვედრაზე მხარეებმა ორმხრივი თანამშრომლობის მიმდინარე საკითხები, რეგიონში არსებული ტენდენციები და სამომავლო გეგმები განიხილეს.

შეხვედრაზე აღინიშნა, რომ საქართველო რეგიონში ერთ-ერთ ყველაზე სწრაფად მზარდ საავიაციო ბაზრად ყალიბდება, რასაც ხელს უწყობს ავიაციის ლიბერალიზაციის პოლიტიკა, ინფრასტრუქტურის მოდერნიზაცია და საერთაშორისო საავიაციო სტანდარტებთან შესაბამისობა. ხაზი გაესვა, რომ მთავრობის თანმიმდევრულმა პოლიტიკამ მნიშვნელოვნად გაზარდა მგზავრთნაკადი, მარშრუტების ხელმისაწვდომობა, ავიაკომპანიების წარმომადგენლობა და ტურისტული ნაკადები.

თამარ იოსელიანის განცხადებით, 2025 წელი საქართველოს საავიაციო სექტორისთვის რეკორდული იყო — ქვეყნის სამივე საერთაშორისო აეროპორტმა 8,5 მილიონამდე მეტ მგზავრს მოემსახურა, რაც წინა წელთან შედარებით 14%-იანი ზრდაა. მისივე თქმით, შესრულებული რეისების რაოდენობა 16%-ით გაიზარდა, ხოლო 85 ავიაკომპანია ოპერირებდა 125 მიმართულებით, რაც საქართველოს რეგიონში მზარდ როლს კიდევ ერთხელ ადასტურებს. ასევე აღინიშნა, რომ დადებითი დინამიკა შენარჩუნდა 2026 წლის პირველ კვარტალშიც.

მინისტრის მოადგილის თქმით, საქართველოს მთავრობა აქტიურად აგრძელებს სააეროპორტო ინფრასტრუქტურის განვითარებას. შეხვედრაზე განიხილეს თბილისის არსებული საერთაშორისო აეროპორტის გაფართოების პროექტი, ვაზიანის ახალი საერთაშორისო აეროპორტის განვითარების გეგმები და ქუთაისის საერთაშორისო აეროპორტის მიმდინარე ინფრასტრუქტურული პროექტები. აღინიშნა, რომ ქუთაისის საერთაშორისო აეროპორტში თანამედროვე სტანდარტების ახალი ასაფრენ-დასაფრენი ზოლის მშენებლობა აქტიურად მიმდინარეობს, ხოლო თბილისის არსებული საერთაშორისო აეროპორტის გამტარუნარიანობა მომდევნო ორი წლის განმავლობაში 10 მილიონ მგზავრამდე გაიზრდება. პარალელურად, იგეგმება ახალი, 20 მილიონ მგზავრზე გათვლილი ვაზიანის საერთაშორისო აეროპორტის განვითარება.

მხარეებმა განიხილეს ზაფხულის ტურისტული სეზონისთვის ავიაკომპანიის გეგმები და რეგიონში არსებული გამოწვევები. აღინიშნა, რომ საქართველო-თურქეთს შორის მზარდი მგზავრთნაკადის ეფექტიანი მართვა ორმხრივ პრიორიტეტს წარმოადგენს.

Turkish Airlines ჯგუფში შედის AJet-იც, რომელიც აქტიურად ოპერირებს საქართველოს ბაზარზე. ორივე ავიაკომპანია მნიშვნელოვან როლს ასრულებს საქართველოსა და თურქეთს შორის საჰაერო კავშირის გაძლიერებასა და ტურისტული და ეკონომიკური ურთიერთობების განვითარებაში.

ინფორმაციას ეკონომიკისა და მდგრადი განვითარების სამინისტრო ავრცელებს.