თბილისის ბაღებში საკვებით ინტოქსიკაციის შედეგად კლინიკებში მოთავსებულები მკურნალობას განაგრძობენ - სურსათის ეროვნული სააგენტო ლაბორატორიაში გადაგზავნილი ნიმუშების შედეგებს მიღებისთანავე გაასაჯაროებს

თბილისის ბაღებში საკვებით ინტოქსიკაციის შედეგად კლინიკებში მოთავსებულები მკურნალობას განაგრძობენ. 55 აღსაზრდელი და ერთი აღმზრდელი სამედიცინო დაწესებულებებში, ერთნაირი სიმპტომებით შეიყვანეს.

„გუშინ 9 ბავშვმა მოგვმართა გვიან ღამის შემდეგ სხვადასხვა ჩივილით, ძირითადად იყო გასტროენტერიტის გულისრევა და ღებინების დიაგნოზები. 4-მა მათგანმა უკვე დატოვა იაშვილის კლინიკა დამაკმაყოფილებელ მდგომარეობაში, 5 მათგანი აგრძელებს მკურნალობას სტაციონარში“, - განაცხადა იაშვილის სახელობის ბავშვთა საავადმყოფოს პედიატრიული სამსახურის ხელმძღვანელმა სოფიო ცერცვაძემ.

სურსათის ეროვნულ სააგენტოში კი აცხადებენ, რომ ლაბორატორიაში გადაგზავნილი ნიმუშების შედეგებს მიღებისთანავე გაასაჯაროებენ.

„სურსათის ეროვნული სააგენტოს უფლებამოსილმა პირებმა აიღეს შესაბამისი სურსათის ნიმუშები სხვადასხვა მაჩვენებელზე კვლევის მიზნით. მოსახლეობის დაუყოვნებლივ ინფორმირებულობას უზრუნველვყოფთ, როგორც კი კვლევის შედეგები ჩვენთვის ცნობილი გახდება. სააგენტოსთვის ბაგა-ბაღებში სახელმწიფო კონტროლის განხორციელება წარმოადგენს პრიორიტეტულ მიმართულებას. შესაბამისად, ჩვენ ვაგრძელებთ სახელმწიფო კონტროლს“, - განაცხადა სურსათის ეროვნული სააგენტოს უფროსის მოადგილემ ვასილ კვერნაძემ.

როგორც ცნობილია, ეპიდემიოლოგიური რისკების დაზღვევის მიზნით, 7 ბაღში სააღმზრდელო პროცესი შეჩერებულია. შესაბამის მოქმედებებს ატარებს ფინანსთა სამინისტროს საგამოძიებო სამსახური.