ტარიელ შავერდაშვილი: გირგვლიანის ამბის შემდეგ დაიძაბა ურთიერთობა ბადრი პატარკაციშვილსა და ხელისუფლებას შორის, რადგან მე და ბადრი ახლოს ვიყავით, ჩემზეც და ჩემს ოჯახზეც დაიწყო ზემოქმედება. 15 ათასი ტონა შაქრით დატვირთული გემი დამიპატიმრა კეზერაშვილმა იმ მიზეზით, თითქოს იარაღი და კონტრაბანდა შემომქონდა

თბილისის საქალაქო სასამართლოში 7 ნოემბრის საქმეზე მიხეილ სააკაშვილის პროცესი გაიმართა.

დღეს ბადრი პატარკაციშვილის მეგობარი ტარიელ შავერდაშვილი გამოკითხეს. მან დეტალურად ილაპარაკა „ნაციონალური მოძრაობის“ ხელისუფლების მხრიდან ბიზნესის რეკეტის და წნეხის შესახებ.

„გირგვლიანის ამბის შემდეგ დაიძაბა ურთიერთობა ბადრი პატარკაციშვილსა და ხელისუფლებას შორის, რადგან ცნობილი იყო, რომ მე და ბადრი ახლოს ვიყავით, ჩემზეც და ჩემს ოჯახზეც დაიწყო ზემოქმედება. სახლთან და სამსახურთან 24 საათის განმავლობაში სოდ-ის მანქანები იდგა. გემით შემოგვქონდა შაქარი. 15 ათასი ტონა შაქრით დატვირთული გემი დამიპატიმრა კეზერაშვილმა. მაშინ ის იყო ფინანსურ პოლიციაში. იმ მიზეზით, თითქოს იარაღი და კონტრაბანდა შემომქონდა. 3 თვე გამაჩერეს, დაახლოებით და ბადრის სიკვდილის შემდეგ მომცეს ნებართვა გამეხსნა. მილიონამდე ჯარიმა გადამახდევინეს. პროკურატურასა და ფინანსურ პოლიციაში მიბარებდნენ ხშირად და ბადრიზე ჰქონდათ კითხვები. შემდეგ იყო „იმედის“ და მეტალურგიის ჩამორთმევა. შაქრის ბიზნესს 100%-ით ვაკონტროლებდით. კეზერაშვილს თავადაც ბიზნესი ჰქონდა. შემდეგ დამიბარეს და მითხრეს, რომ შაქრის ბიზნესს აღარ გავკარებოდი“, - განაცხადა ტარიელ შავერდაშვილმა.