თეირანი პირობას დებს, რომ ახალი სანქციების მიუხედავად, ჰორმუზის სრუტეზე კონტროლს შეინარჩუნებს

ირანმა განაცხადა, რომ შეინარჩუნებს კონტროლს სტრატეგიულად მნიშვნელოვან ჰორმუზის სრუტეზე. პარალელურად, თეირანმა მკაცრად გააკრიტიკა ევროკავშირის მიერ დაწესებული ახალი სანქციები, რომლებიც იმ ფიზიკურ პირებსა და უწყებებს შეეხო, რომლებიც ამ სანაოსნო მარშრუტზე ირანის „სუვერენიტეტის“ განმტკიცებაში მონაწილეობენ.

ირანის საგარეო საქმეთა მინისტრის მოადგილემ, ქაზემ ღარიბაბადიმ ევროკავშირის გადაწყვეტილებას „თაღლითური ნაბიჯი“ უწოდა. მანამდე, ბლოკის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში განაცხადა, რომ ევროკავშირის წევრმა სახელმწიფოებმა სანქციები დააწესეს რამდენიმე ირანელის წინააღმდეგ, რომლებიც სრუტეში საზღვაო მიმოსვლის შეზღუდვაში მონაწილეობდნენ.

აღსანიშნავია, რომ თეირანმა ეს სანაოსნო მარშრუტი თებერვალში ომის დაწყების შემდეგ, ფაქტობრივად, სრულად ჩაკეტა.

„ირანი არანაირ ფასს არ ანიჭებს ევროპის ამ პოლიტიკურ და თვალთმაქცურ ნაბიჯს და გააგრძელებს თავის სტრატეგიას, რომელიც ჰორმუზის სრუტეზე სუვერენიტეტის შენარჩუნებასა და სუვერენული უფლებების განხორციელებას გულისხმობს“, - დაწერა ღარიბაბადიმ სოციალურ ქსელ X-ში.