თელავისხევზე ნაპირსამაგრი სამუშაოები უწყვეტ რეჟიმში გრძელდება

თელავისხევზე ნაპირსამაგრი სამუშაოები ამ დრომდე უწყვეტი რეჟიმით გრძელდება. ტერიტორიიდან ქვა-ღორღისა და დაზიანებული ინფრასტრუქტურის ნარჩენების დიდი ნაწილი უკვე გატანილია.

ადგილზე კვლავ მუშაობს მძიმე ტექნიკა, რომელიც ამ ეტაპზე სეხნიაშვილის ქუჩის გაწმენდით სამუშაოებს ასრულებს. პარალელურად, გრძელდება სათავე ნაგებობამდე მისასვლელი გზის გაჭრა, რომელიც პირველ დამცავ დამბამდე უნდა მივიდეს.

აღნიშნული სამუშაოების დასრულების შემდეგ დაიწყება დამბასთან ღვარცოფის მიერ მიტანილი ქვა-ღორღისა და ხეებისგან ტერიტორიის გაწმენდა. უკვე რამდენიმე დღეა, ინტენსიურად მიმდინარეობს თელავისხევის გაფართოებისა და გაღრმავების სამუშაოები, რაც მომავალში მსგავსი საფრთხის პრევენციისთვის მნიშვნელოვანია.

ქალაქის მასშტაბით საკომუნიკაციო სისტემის ფუნქციონირება ფაქტობრივად, სრულად აღდგენილია. პრობლემები მხოლოდ რამდენიმე ადგილზე რჩება, სადაც შესაბამისი კომპანიები აღდგენით სამუშაოებს აქტიურად განაგრძობენ.