თელავში ე.წ. დამბების გაწმენდითი სამუშაოები ინტენსიურად გრძელდება
თელავში სელური ნაკადის დამჭერი ნაგებობის ე.წ. „დამბების" გაწმენდითი სამუშაოები ინტენსიურად გრძელდება. კახეთის მხარეში სახელმწიფო რწმუნებულმა და თელავის, ახმეტის, ყვარლისა და ლაგოდეხის დელეგატმა მიმდინარე სამუშაოები დაათვალიერეს.
12 ივლისს, თელავში მომხდარი სტიქიის შედეგად თელავისხევზე მდებარე სელური ნაკადის მიმღები ნაგებობა მერქნისგან და სხვა ნატანი მასალისგან მნიშვნელოვნად დაზიანდა. გაწმენდითი სამუშაოების დასრულების შემდეგ, დარგობრივი სპეციალისტების მიერ მომზადებული დასკვნის საფუძველზე, სელური ნაკადის მიმღები ნაგებობის მოვლა-შენახვისთვის საჭირო ღონისძიებები დაიგეგმება.
„კალაპოტი უკვე თავის საწყის ნიშნულზეა დაბრუნებული, მაგრამ სამუშაოები გაგრძელდება, რადგან დამბებს სჭირდება შემდგომი რეაბილიტაცია. ამ დამბებმა მიიღო ყველაზე დიდი დარტყმა. უკვე იწყებს მუშაობას საინჟინრო ჯგუფი, რომელიც დამბების რეკონსტრუქცია გამაგრების სამუშაოებთან დაკავშირებით გააკეთებს დასკვნას და გადავალთ დამბების მოწესრიგების საკითხზე", - განაცხადა პარლამენტის რეგიონული პოლიტიკის კომიტეტის თავმჯდომარემ, თელავის, ახმეტის, ყვარლისა და ლაგოდეხის დელეგატმა ირაკლი ქადაგიშვილმა.
იმედი
წყარო: imedinews.ge