თენგიზ შარმანაშვილი აშშ-ის მინისტერიალზე გადაღებულ ფოტოზე, სადაც მაკა ბოჭორიშვილი მარკო რუბიოს გვერდით დგას: როდესაც საერთო ფოტოს გადაღების დროს მიგიწვევს მასპინძელი ქვეყნის საგარეო უწყების ხელმძღვანელი, მოგიწოდებს, მის გვერდით დადგე და ასე წარუდგენს მსოფლიოს ფორუმს, ეს ცოტას მანიშნებელი არ არის

რუბიოს ეს ნაბიჯი ბევრის მანიშნებელი იყო. ზოგჯერ პატარა დეტალსაც აქვს მნიშვნელობა. როდესაც საერთო ფოტოს გადაღების დროს მიგიწვევს მასპინძელი ქვეყნის საგარეო უწყების ხელმძღვანელი, მოგიწოდებს, მის გვერდით დადგე და ასე წარუდგენს მსოფლიოს ფორუმს, ეს ცოტას მანიშნებელი არ არის, - განაცხადა „დღის ქრონიკასთან“ თავდაცვისა და უშიშროების კომიტეტის თავმჯდომარის პირველმა მოადგილემ, თენგიზ შარმანაშვილმა.

წამყვანმა ჰკითხა, ახლა არსებული კომუნიკაცია აშშ-ის ახალ ადმინისტრაციასთან რა პერსპექტივას უჩვენებს, როგორ მოჩანს საქართველო-აშშ-ის ურთიერთობების ნორმალიზება და რა სამოქმედო გეგმა აქვს საქართველოს.

„ჩვენ ჩვენს სამოქმედო გეგმას ვასრულებთ. ვერ ვიქნებით პასუხისმგებლები ტემპებზე, რას და რა დროში გააკეთებს ამერიკის შეერთებული შტატები. არასერიოზული იქნება ამ გეგმებზე ვისაუბროთ. ბურთი მათ მხარეზეა. არავის ეგონოს, რომ ამ პროცესს ხელს არ შეუშლიან. არავის ეგონოს კიდევ, რომ „დიფ სთეითის“, თუ გნებავთ რადიკალური, ლიბერალური ძალების წარმომადგენლებს გავლენები ახლა არ გააჩნიათ, ვინაიდან ტრამპია ადმინისტრაციის ხელმძღვანელი ახლა. მას ახლაც უპირისპირდებიან და ესენი მხოლოდ დემოკრატები არ არიან. საკმაოდ დიდი გავლენები აქვს „დიფ სთეითს“ და დროდადრო იჩენს ხოლმე თავს. რუბიოს ეს ნაბიჯი ბევრის მანიშნებელი იყო. ზოგჯერ პატარა დეტალსაც აქვს მნიშვნელობა. როდესაც საერთო ფოტოს გადაღების დროს მიგიწვევს მასპინძელი ქვეყნის საგარეო უწყების ხელმძღვანელი, მოგიწოდებს, მის გვერდით დადგე და ასე წარუდგენს მსოფლიოს ფორუმს, ეს ცოტას მანიშნებელი არ არის“, - აღნიშნა შარმანაშვილმა.

საქართველოს ვიცე-პრემიერმა, საგარეო საქმეთა მინისტრმა მაკა ბოჭორიშვილმა, ამერიკის შეერთებული შტატების სახელმწიფო მდივნის, მარკო რუბიოს მიწვევით, მონაწილეობა მიიღო მინისტერიალში „პოლიტიკური ტერორიზმის ხელახალი გააქტიურების შესახებ“.