თენგიზ შარმანაშვილი გორში მომხდარ ინციდენტთან დაკავშირებით ოპოზიციის განცხადებებზე: სისტემური იქნებოდა ეს დანაშაული, თუ რეაგირება იქნებოდა ყალბი, ან ხელისუფლება შეეცდებოდა რაღაც ფაქტები მიეჩქმალა და ისე დაეწყო გამოძიება

სისტემური იქნებოდა ეს დანაშაული, თუ რეაგირება იქნებოდა ყალბი, ან ხელისუფლება შეეცდებოდა რაღაც ფაქტები მიეჩქმალა და ისე დაეწყო გამოძიება, - აცხადებს თავდაცვისა და უშიშროების საპარლამენტო კომიტეტის თავმჯდომარის პირველი მოადგილე თენგიზ შარმანაშვილი.

დეპუტატი გორში მომხდარი მძიმე ინციდენტის შესახებ ოპოზიციის განცხადებებს ეხმაურება.

„მყისიერად მოხდა გამოძიება. ასე მოკლე დროში ამის გაკეთება მეტყველებს იმაზე, რომ სახელმწიფო არავის აპატიებს ძალადობრივ დანაშაულს. იქ არამხოლოდ რეპრესიები ხდებოდა და ქუჩაში ადამიანების დახოცვა, შემდეგ ფაქტებსაც აყალბებდნენ. მსგავს ფაქტებს ჩვენი ხელისუფლების პირობებში ვერ აღმოაჩენთ“, - აღნიშნა შარმანაშვილმა.

საქართველოს პროკურატურამ სამსახურებრივი უფლებამოსილების ძალადობით გადამეტების ფაქტზე 6 პოლიციელი დააკავა.

გორში მომხდარი მძიმე ინციდენტი პოლიტიკური სპექტრის ნაწილმა კვლავ სპეკულაციებისთვის გამოიყენა, რასაც გორის პოლიციის განყოფილებასთან ოპოზიციურად განწყობილთა პროტესტიც მოჰყვა. მმართველი გუნდის ოპონენტებმა მომხდარს სისტემური უწოდეს, რასაც სახელისუფლებო გუნდმა არგუმენტები დაუპირისპირა.