თენგიზ შარმანაშვილი: ფაქტი ერთია - უკვე აბსოლუტურად სხვა სიმაღლეზე ავიდა ჩვენი სპეცსამსახურების შესაძლებლობები. ძალიან ბევრი რამ კონტროლს ექვემდებარება და ჯაშუშური საქმიანობის არცერთი ფაქტი უყურადღებოდ არ დარჩება
თენგიზ შარმანაშვილი პარიზის მიერ საქართველოდან საფრანგეთის დაზვერვის აგენტების გაწვევის შესახებ გავრცელებულ ინფორმაციას ეხმიანება. ამ თემაზე თავდაცვისა და უშიშროების საპარლამენტო კომიტეტის თავმჯდომარის პირველმა მოადგილემ „დღის ქრონიკაში“ ისაუბრა.
„ფაქტი ერთია - უკვე აბსოლუტურად სხვა სიმაღლეზე ავიდა ჩვენი სპეცსამსახურების შესაძლებლობები. ძალიან ბევრი რამ კონტროლს ექვემდებარება და, რა თქმა უნდა, უყურადღებოდ არ დარჩება ჯაშუშური საქმიანობის არცერთი ფაქტი, რომელიც საქართველოს ინტერესების საწინააღმდეგოდ იქნება მიმართული.
ამავე დროს, პოლიტიკური ნებაც არის მომწიფებული, იმისთვის რომ თუ ზოგიერთი ქვეყანა არ შეანელებს თავისი სპეცსამსახურების საქმიანობას ჯაშუშების გადაბირების ან მსგავსი სპეციალური ოპერაციების სახით, საქართველო უფრო გადამჭრელ ზომებს მიიღებს. ეს არის მთავარი გზავნილი და ალბათ შეისმენს მომავალში ის, ვინც უნდა შეისმინოს“, - მიიჩნევს შარმანაშვილი.
ფრანგული მედიის ინფორმაციით, ქართული უსაფრთხოების სამსახურის მიერ ჩატარებულმა ოპერაციამ ორ ქვეყანას შორის ურთიერთობები დაძაბა - საფრანგეთის საგარეო დაზვერვის სამსახური იძულებული გახდა, თბილისიდან პარიზში დაზვერვის ორი აგენტი გაეწვია.
იმედი
წყარო: imedinews.ge