The Hill: ევროპელი ლიდერები შეშფოთებას გამოთქვამენ იმის გამო, რომ რუსეთი ნატოს წევრი ქვეყნების წინააღმდეგ წლების განმავლობაში მიმდინარე ჰიბრიდულ ომს ამწვავებს

ევროპელი ლიდერები შეშფოთებას გამოთქვამენ იმის გამო, რომ რუსეთი ნატოს წევრი ქვეყნების წინააღმდეგ წლების განმავლობაში მიმდინარე ჰიბრიდულ ომს ამწვავებს - კრემლი ამ ნაბიჯებს უკრაინის წინააღმდეგ თითქმის ხუთწლიან ომში გარდამტეხი წარმატების მიღწევის სირთულეების ფონზე დგამს, - წერს ამერიკული გამოცემა The Hill-ი.

ოფიციალური პირების განცხადებით, ევროპული ქვეყნების წინააღმდეგ მიმართული იერიშები მოიცავს დივერსიებს ინფრასტრუქტურაზე, მიზანმიმართულ ძალადობას პოლიტიკურ ოპონენტებსა და გავლენის ოპერაციებს - მოსყიდვითა და არჩევნებში ჩარევით დაწყებული, დეზინფორმაციული კამპანიებით დამთავრებული.

აშშ-ის იუსტიციის დეპარტამენტის მიერ ახლახან გასაჯაროებული საბრალდებო დასკვნის თანახმად, რუსეთის დაზვერვის წარმომადგენლები ამერიკაში პოლიტიკური დისიდენტებისა და უკრაინის მხარდამჭერების მკვლელობებს გეგმავდნენ. ბრალდებულები კვლავ თავისუფლებაზე იმყოფებიან.

„ეს სრულმასშტაბური პროცესია“, - განაცხადა ლატვიის საგარეო საქმეთა მინისტრმა, ბაიბა ბრაჟემ გამოცემა The Hill-თან ინტერვიუში.

მან რუსეთის ქმედებები ევროპისა და აშშ-ის წინააღმდეგ მიმართულ არატრადიციულ ომად შეაფასა, რაც სცილდება იმ ჩარჩოებს, რასაც აქამდე კრემლის „ჰიბრიდულ“ ან „რუხი ზონის“ ომად მოიხსენიებდნენ.

„ამ ქმედებებს ჰიბრიდულს ვერაფრით ვუწოდებთ, რადგან ეს რეალური თავდასხმებია“, - აღნიშნა მან.

საზოგადოების ცნობიერების ამაღლება ევროპის საპასუხო სტრატეგიის საკვანძო ელემენტია. მისი მიზანია ამგვარი იერიშებისგან თავდაცვის გაძლიერება ისე, რომ პროცესი ვლადიმირ პუტინთან პირდაპირ სამხედრო დაპირისპირებაში არ გადაიზარდოს.

ევროპის მიერ რუსეთისგან თავდაცვის სტრატეგიის კიდევ ერთი საკვანძო ელემენტი უკრაინის მხარდაჭერის გაზრდაა. ეს მოიცავს არა მხოლოდ შეიარაღების მიწოდებას, არამედ ფინანსურ დახმარებას, ასევე პუტინის ომის მხარდამჭერი რუსული ბიზნესებისა და ოფიციალური პირების წინააღმდეგ სანქციების დაწესებასა და მათ საერთაშორისო იზოლაციას.