The New York Times: ევროპისთვის უკრაინის წინააღმდეგ ღამით განხორციელებული რუსული საჰაერო დარტყმები გაფრთხილებაა იმის შესახებ, თუ რამდენად მოწყვლადი იქნება კონტინენტი, კონფლიქტი ოდესმე ნატოს ტერიტორიაზე თუ გადავა

ევროპისთვის უკრაინის წინააღმდეგ ღამით განხორციელებული რუსული საჰაერო დარტყმები გაფრთხილებაა იმის შესახებ, თუ რამდენად მოწყვლადი იქნება კონტინენტი, კონფლიქტი ოდესმე ნატოს ტერიტორიაზე თუ გადავა, - წერს ამერიკული გამოცემა The New York Times-ი.

იმ დროს, როდესაც პრეზიდენტ ტრამპს ევროპიდან აშშ-ის სამხედრო რესურსების ნაწილი გაჰყავს და კიდევ უფრო მეტის გაყვანას განიხილავს, ნატოს მოკავშირეები ცდილობენ, ეს დანაკლისი როგორმე შეავსონ. ოფიციალური პირები და ექსპერტები აცხადებენ, რომ ისინი ამ მიზნის მიღწევამდე ჯერ კიდევ ძალიან შორს არიან.

„თუ ვინმეს აქ კვლავ ჰგონია, რომ ევროკავშირს ან მთლიანად ევროპას აშშ-ის გარეშე თავდაცვა შეუძლია, ოცნებებში დარჩეს“, - განაცხადა იანვარში ნატოს გენერალურმა მდივანმა, მარკ რუტემ. - „ეს შეუძლებელია. ჩვენ ამას ვერ შევძლებთ. ჩვენ ერთმანეთი გვჭირდება“.

მას შემდეგ, რაც გასული წლის განმავლობაში ტრამპმა ამერიკული მხარდაჭერა მკვეთრად შეზღუდა, ევროპა უკრაინის თავდაცვისა და სტაბილიზაციისთვის გაცილებით მეტ თანხას ხარჯავს. როგორც ევროკავშირის საგარეო პოლიტიკის ხელმძღვანელმა, კაია კალასმა ხუთშაბათს სოციალურ ქსელში განაცხადა, ევროკავშირმა მიმდინარე კვირას უკრაინისთვის 6 მილიარდი ევროს გადარიცხვა დაიწყო. ეს თანხა 90-მილიარდიანი სესხის ნაწილია, რომელიც ქვეყნის თავდაცვისუნარიანობის გაძლიერებას ისახავს მიზნად.