The Telegraph: 100 მილიონ გირვანქა სტერლინგად შეფასებული იახტა, რომელიც პუტინთან არის დაკავშირებული, უკრაინულ დრონებს გაურბის

რუსეთის პრეზიდენტ ვლადიმირ პუტინთან დაკავშირებული სუპერიახტა სახელწოდებით Graceful, სავარაუდოდ, ევროპის წყლებს ტოვებს და რუსეთის ჩრდილოეთ პორტისკენ, მურმანსკისკენ მიემართება. ინფორმაციას The Telegraph-ი საზღვაო სადაზვერვო მონაცემებსა და სატელიტურ გამოსახულებებზე დაყრდნობით ავრცელებს.

გამოცემის ინფორმაციით, დაახლოებით 100 მილიონი გირვანქა სტერლინგის ღირებულების 82-მეტრიანი იახტა ნორვეგიის სანაპიროს მიუყვება. The Telegraph-ის ცნობით, ხომალდს თან ახლავს რუსეთის სამხედრო-საზღვაო ძალების ორი გემი, ხოლო მის გადაადგილებას NATO აკვირდება.

სტატიის თანახმად, იახტის გემბანი ანტიდრონული ბადეებით არის დაფარული.

The Telegraph-ის ინფორმაციით, Graceful-ს რუსეთის სამხედრო-საზღვაო ძალების გამანადგურებელი „სევერომორსკი“ და სამაშველო-საპატრულო ხომალდი „ვოევოდა“ აცილებენ.

გამოცემა ნატოს მაღალი რანგის წყაროზე დაყრდნობით, ასევე წერს, რომ ბალტიის ზღვაში რუსული გემების გადაადგილებას გერმანიისა და დანიის სამხედრო-საზღვაო ძალებიც აკვირდებოდნენ.

სტატიაში აღნიშნულია, რომ იახტის გადაადგილება, სავარაუდოდ, უკრაინული დრონებით შესაძლო თავდასხმებისგან თავის არიდებას უკავშირდება.