The Telegraph: რუსეთი კონსტანტინოვკის ასაღებად ემზადება

რუსული ჯარი დონბასის რეგიონის უმნიშვნელოვანეს საყრდენ პუნქტში, ქალაქ კონსტანტინოვკაში შევიდა და მის ასაღებად ემზადება. ინფორმაციას The Telegraph-ი ავრცელებს.

როგორც გამოცემა იუწყება, უკრაინელი ჯარისკაცები აცხადებენ, რომ მთელი ქალაქი ფაქტობრივად „რუხ ზონაშია“ მოქცეული და მას არცერთი მხარე აღარ აკონტროლებს. თავის მხრივ, რუსეთის თავდაცვის სამინისტრო აცხადებს, რომ რუსული საჯარისო შენაერთები აქტიურად მოქმედებენ ქალაქის სამხრეთ-დასავლეთ ნაწილში და უკრაინულ ნაწილებს, თითქოს, ალყაში აქცევენ.

„აღნიშნულმა შეტევამ გააძლიერა შიშები იმის თაობაზე, რომ მოსკოვი კონსტანტინოვკის ალყაში მოქცევასა და დაპყრობას გეგმავს, რამაც, შესაძლოა, დონეცკის ოლქის აღმოსავლეთში მდებარე თავდაცვის ბოლო ზღუდეებამდე, კრამატორსკამდე და სლავიანსკამდე, გზა გახსნას“, - წერს გამოცემა.

ერთ-ერთი უკრაინელი სამხედრო, რომელიც უპილოტო საფრენ აპარატებს მართავს, BBC-თან საუბარში აღნიშნავს, რომ კონსტანტინოვკაში შესული რუსი სამხედროების გამოყრა ძალიან რთულია. მისი თქმით, ვითარება „დიდ კრიზისად“ იქცა.

როგორც The Telegraph-ი იუწყება, რუსები იგივე ტაქტიკას იყენებენ, რასაც 2025 წელს პოკროვსკის დაპყრობისას მიმართავდნენ. ისინი ფლანგებიდან მიიწევენ წინ, რათა ქალაქი ალყაში მოაქციონ და მომარაგების გზები გადაკეტონ.