The Wall Street Journal: ვარშავაც და კიევიც თავის საერთო მტრად რუსეთს ასახელებენ, თუმცა ვერ თანხმდებიან იმაზე, თუ როგორ გაუმკლავდნენ საკუთარ მტკივნეულ წარსულს

ვარშავაც და კიევიც თავის საერთო მტრად რუსეთს ასახელებენ, თუმცა ვერ თანხმდებიან იმაზე, თუ როგორ გაუმკლავდნენ საკუთარ მტკივნეულ წარსულს. The Wall Street Journal-ის ცნობით, კონფლიქტი უკრაინის აჯანყებულთა არმიის (УПА) გარშემო - რომლის წევრებსაც უკრაინაში გმირებად მიიჩნევენ, ხოლო პოლონეთში მასობრივი სიკვდილით დასჯის ორგანიზატორებად - ორ ქვეყანას შორის ურთიერთობებს აუარესებს და რუსეთს მათ შორის ბზარის გასაჩენად ხელსაყრელ საბაბს აძლევს.

გამოცემა აღნიშნავს, რომ მოსკოვი უკვე იყენებს უკრაინის მიერ УПА-ს გმირობის აღიარებას ვლადიმირ პუტინის იმ განცხადებების დასასაბუთებლად, თითქოს მან ომი უკრაინის „დენაციფიკაციისთვის“ დაიწყო. გასულ თვეს რუსეთის გენერალურმა პროკურატურამ УПА და სხვა პარტიზანული ფორმირებები კოლაბორაციონისტებად და სამხედრო დამნაშავეებად გამოაცხადა.

თითქმის ეჭვგარეშეა, რომ კრემლი ხელიდან არ გაუშვებს არცერთ შესაძლებლობას უკრაინასა და პოლონეთს შორის ურთიერთობების კიდევ უფრო დასაძაბად - ქვეყანასთან, რომლის მხარდაჭერაც ბოლო ოთხნახევარი წლის განმართლობაში კიევის თავდაცვისუნარიანობის ერთ-ერთ მთავარ საყრდენად იქცა, წერს WSJ.

„ისტორიის ერთ-ერთი მთავარი გაკვეთილი ასეთია: როდესაც პოლონელები და უკრაინელები საერთო ენას ვერ პოულობენ, იგებს მოსკოვი“, - განაცხადა პოლონეთში აშშ-ის ყოფილმა ელჩმა და Atlantic Council-ის ექსპერტმა, დენიელ ფრიდმა.

მიმდინარე გაზაფხულზე უკრაინის პრეზიდენტმა, ვოლოდიმირ ზელენსკიმ ერთ-ერთ სამხედრო ქვედანაყოფს სახელი УПА-ს პატივსაცემად მიანიჭა, რასაც პოლონეთის მკვეთრი რეაქცია მოჰყვა.

ვარშავამ ეს გადაწყვეტილება შერიგების ხანგრძლივ პროცესში სერიოზულ უკან გადადგმულ ნაბიჯად შეაფასა, ხოლო პოლონეთის პრეზიდენტმა, კაროლ ნავროცკიმ ზელენსკის პოლონეთის უმაღლესი ჯილდო ჩამოართვა.

საპასუხოდ, ზელენსკიმ გამოტოვა პოლონეთში გამართული კონფერენცია, რომელიც უკრაინის ომისშემდგომ აღდგენას ეძღვნებოდა. პოლონეთმა კი განაცხადა, რომ დაბლოკავს უკრაინის ევროკავშირში გაწევრიანების განაცხადს მანამ, სანამ კიევი УПА-ს პატივისგებას განაგრძობს.

მას შემდეგ ორივე მხარე ცდილობს დაძაბულობის შემცირებას. ზელენსკიმ პირობა დადო, რომ უკრაინის სპეცსამსახურების არქივებს გახსნის და ვოლინში ახალი ექსჰუმაციების ჩატარების ნებართვას გასცემს. თავის მხრივ, ვარშავამ ცოტა ხნის წინ 50 მილიონი დოლარის ღირებულების სამხედრო დახმარების ახალი პაკეტი გამოაცხადა. ასევე გრძელდება მოლაპარაკებები უკრაინისთვის МиГ-29 ტიპის გამანადგურებლების გადაცემაზე.

ამასთან, ევროპული ქვეყნების წარმომადგენლები, ისევე როგორც პოლონეთისა და უკრაინის ოფიციალური პირები აფრთხილებენ მხარეებს, რომ ასეთი უთანხმოება არცერთ მხარეს არ მოუტანს სარგებელს.

„უკრაინას სჭირდება პოლონეთის სამხედრო დახმარება რუსეთთან საბრძოლველად, ხოლო პოლონეთს სჭირდება უკრაინული დრონების წარმოების ტექნოლოგიები საკუთარი თავდაცვის გასაძლიერებლად მომავალი საფრთხეების შემთხვევაში“, - აღნიშნავს WSJ.