The Wall Street Journal-ის გამოკითხვა: შუალედურ არჩევნებამდე რამდენიმე კვირით ადრე, დონალდ ტრამპის რეიტინგი რეკორდულ მინიმუმამდე დაეცა

გაზეთ The Wall Street Journal-ის მიერ ჩატარებული საზოგადოებრივი აზრის ახალი გამოკითხვის თანახმად, შუალედურ არჩევნებამდე რამდენიმე კვირით ადრე, პრეზიდენტ დონალდ ტრამპის საქმიანობის მოწონების რეიტინგი რეკორდულ მინიმუმამდე - 37%-მდე შემცირდა.

გამოცემის დაკვეთით ჩატარებული გამოკითხვების ისტორიაში, რომელიც ჯორჯ ბუშ-უფროსის პრეზიდენტობის პერიოდიდან იწყება, ეს შუალედური არჩევნების წინ მოქმედი პრეზიდენტისთვის დაფიქსირებული ყველაზე დაბალი მაჩვენებელია. შედარებისთვის, აქამდე ყველაზე დაბალი რეიტინგი ჯორჯ ბუშ-უმცროსს ჰქონდა, რომლის მაჩვენებელიც მეორე ვადის შუალედურ არჩევნებამდე 39%-ს შეადგენდა.

არჩევნებამდე დაახლოებით ერთი თვით ადრე, პრეზიდენტი და „რესპუბლიკური პარტია“ საკმაოდ რთული საარჩევნო გარემოს წინაშე დგანან. „რესპუბლიკელებისთვის“ მთავარ გამოწვევად რჩება არაპოპულარული ომი ირანში, რომლის დაწყებიდანაც უკვე შვიდი თვე გავიდა.

ბოლო გამოკითხვებში „დემოკრატები“ უპირატესობას ინარჩუნებენ, ხოლო ისეთი საკითხები, როგორებიცაა მიგრაცია და ცხოვრების გაძვირება, არჩევნების მოახლოებასთან ერთად ტრამპისა და მისი პარტიის პოზიციებს კიდევ უფრო ასუსტებს.

გამოკითხვის თანახმად, რესპონდენტთა 60% მიიჩნევს, რომ ტრამპის ეკონომიკურმა პოლიტიკამ ქვეყანაში ვითარება გააუარესა, 25% თვლის, რომ მისი ნაბიჯები პოზიტიური იყო, ხოლო 10%-ის აზრით, პრეზიდენტის პოლიტიკას ეკონომიკაზე გავლენა არ მოუხდენია. დარჩენილ 5%-ს პასუხის გაცემა გაუჭირდა ან პოზიცია არ დაუფიქსირებია.