The Washington Post: თეთრმა სახლმა CNN-ს ტრამპთან ერთად თვითმფრინავში მგზავრობა აუკრძალა

თეთრმა სახლმა CNN-ს აშშ-ის პრეზიდენტ დონალდ ტრამპთან ერთად საპრეზიდენტო თვითმფრინავით ტენესის შტატის ქალაქ ნოქსვილში შაბათს დაგეგმილ ვიზიტზე გამგზავრება აუკრძალა. ინფორმაციას The Washington Post-ი ავრცელებს.

აღნიშნული გადაწყვეტილება საფრთხეს უქმნის თეთრი სახლის ტელემაუწყებლების მორიგეობით მუშაობის სისტემას, რომელიც პარასკევს, მცირე პაუზის შემდეგ, დროებით აღდგა, წერს გამოცემა.

როგორც The Washington Post-ი იუწყება, CNN-თან ერთად, გასულ კვირას თეთრ სახლში შესვლა MS NOW-სა და POLITICO-საც აეკრძალათ. თუმცა, ხუთშაბათს დილით ფედერალურმა მოსამართლემ ტრამპის ეს გადაწყვეტილება შეცვალა და მედიასაშუალებების წარმომადგენლები თეთრ სახლში დაუშვა.

ტელემაუწყებლების ხუთკაციან მორიგე ჯგუფში, რომელშიც CNN-თან ერთად ABC, CBS, NBC და Fox News შედიან, ტრამპის გაშუქება პარასკევს დილით განახლდა. ჯგუფმა მუშაობა მას შემდეგ შეაჩერა, რაც CNN-ს თეთრ სახლში შესვლა აეკრძალა.

პარასკევს მორიგე მაუწყებლის ფუნქციას CBS ასრულებდა და ჩინეთის პრეზიდენტ სი ძინპინთან ტრამპის შეხვედრისა და სხვა ღონისძიებების ვიდეომასალა გადაიღო. გამონაკლისი იყო ეროვნული არქივის შენობაში გამართული შუადღის ღონისძიება, რომლის გაშუქებაც CNN-ს ევალებოდა.